ხარაგაულში მოქმედ საზოგადოებრივ ორგანიზაციებს შორის ერთ-ერთია „ქალები ქვეყნის მომავლისათვის“.

ორგანიზაცია 2012 წელს ხათუნა მანჯავიძემ დააფუძნა იმ მიზნით, რომ ეკოლოგიური პრობლემების მოგვარებასა და ამ კუთხით ქალების გააქტიურებაზე ეზრუნათ. ამ წლების განმავლობაში პროექტები ხარაგაულსა და ზესტაფონში განახორციელეს.

რომელი პროექტია ყველაზე შედეგიანი და რა გეგმები აქვს სამომავლოდ, – ამის შესახებ ხათუნა მანჯავიძეს ვესაუბრეთ.

„2013 წელს ხარაგაულში ნარჩენების დახარისხების პროექტი განვახორციელეთ, – ამბობს ხათუნა მანჯავიძე, – პირველად საქართველოში პოლიეთილენის ბოთლებისა და ცელოფნისთვის 26 ცალი ურნა განთავსდა. შეგროვებული ნარჩენები მუშავდებოდა და იყიდებოდა. ამ პროექტის გამო ხარაგაული, როგორც ყველაზე სუფთა მუნიციპალიტეტი დაჯილდოვდა. ეს პროექტი კი საქართველოში გაეროს წლის საუკეთესო პროექტად დასახელდა.

  • ჩვენი თაოსნობით საღანძილეში, საქარიქედში, კიცხსა და ვერტყვიჭალაში ნაგავსაყრელების ადგილზე სკვერები მოეწყო;
  • 30 კვტ-მდე სიმძლავრის მზის ელექტროსადგური ხარაგაულის #1, ვარძიის, კიცხის, წყალაფორეთისა და ბორითის საბავშვო ბაღებში დავამონტაჟეთ;
  • უბისაში გარე განათება მოვაწყვეთ;
  • ბორჯომ-ხარაგაულის ეროვნული პარკის ტერიტორიაზე მყოფ მწყემსებს ხუთ ბინაზე მზის სადგურები გავუკეთეთ
  • და ენერგოეფექტური ღუმელები დავურიგეთ. ამჟამად ისინი ნაკლებ  შეშას მოიხმარენ და ეს ეკოლოგიური თვალსაზრისით ძალზედ მნიშვნელოვანია. გარდა ამისა, ამ პროექტით ხელი შევუწყვეთ შიდა მეურნეობის განვითარებას ალპურ საძოვრებზე.
  • მნიშვნელოვანი პროექტები გვქონდა ზესტაფონში – ფეროშენადნობთა ქარხნისა და საქარის გამყოფ საზღვარზე ორკილომეტრიანი ქარსაცავი ზოლი გავაშენეთ. ასევე ზესტაფონში მოვაწყვეთ აქცია „100 ქალის 100 ხე“.

ხათუნა მანჯავიძე ამბობს, რომ ხარაგაულის მუნიციპალიტეტის ადგილობრივი ხელისუფლება საზოგადოებრივ ორგანიზაციასთან სათანადოდ არ თანამშრომლობს.

„ყველაზე აღიარებული და წარმატებული ნარჩენების მართვის პროექტი კრახით დასრულდა, – ამბობს ხათუნა მანჯავიძე, – სანამ პროექტს ჩვენ ვმართავდით, მუნიციპალიტეტში წელიწადნახევარში 5 ტონა პოლიეთილენის ბოთლი და ცელოფნის პარკი შეგროვდა.

2015 წელს პროექტის მართვა თვითმმართველობას გადავეცი, რადგან მათი თანადაფინანსებით განხორციელდა. „ხარაგაულდასუფთავებამ“ ბუნკერების დაცლა შეწყვიტა, პრესი გაიძარცვა.

ამჟამად 5 კვტ-მდე სიმძლავრის მზის ელექტროსადგურს ვამონტაჟებთ იმ ინდმეწარმე ქალების საწარმოებზე, რომლებმაც ბიზნესი ახლა წამოიწყეს და პანდემიამ ხელი შეუშალა.

საზოგადოებრივ ორგანიზაციას ბევრი სასიკეთო საქმის გაკეთება შეუძლია. ბევრი პროექტი ადგილობრივ თვითმმართველობასთან თანამშრომლობას მოითხოვს. ამ კუთხით შემხვედრი ნაბიჯების მოლოდინი ნაკლებად მაქვს“.

ლიკა ხიჯაკაძე