გასული 24 საათის განმავლობაში კორონავირუსი 10 ხარაგაულელს დაუდასტურდა და ამით ხარაგაულში covid-19-ით ინფიცირებულთა რაოდენობა 79-მდე გაიზარდა. მათ შორის 13 გამოჯანმრთელებულია.

დანარჩენი 66 ინფიცირებულიდან 4 კლინიკაში მკურნალობს, ხოლო 62 – ბინაზე, ექიმის მეთვალყურეობის ქვეშ.

ხარაგაულის საზოგადოებრივი ჯანდაცვის ცენტრის ექიმ ნინო ყიფშიძის ინფორმაციით, 19 ნოემბრის მდგომარეობით, ხარაგაულის მუნიციპალიტეტში თვითიზოლაციაში 112 მოქალაქე იმყოფება.
ახალი შემთხვევების კონტაქტების მოძიება მიმდინარეობს.

კორონავირუსის ახალი შემთხვევები დადასტურდა დაბა ხარაგაულში, ღარიხევში, კიცხში, ვერტყვიჭალაში, ბორითში, ლახუნდარასა და ბჟინევში.

აღსანიშნავია, რომ ინფიცირებულია ხარაგაულის კოვიდცენტრის ორი თანამშრომელი. ხარაგაულის პოლიციაში ინფიცირებულ თანამშრომელთა რაოდენობა ექვსამდე გაიზარდა.

ეპიდსიტუაციის დამძიმების გამო ხარაგაულის მუნიციპალიტეტში თორმეტი სკოლა დისტანციურ სწავლებაზე იმყოფება, ხარაგაულის მუნიციპალიტეტში მოქმედი საბავშვო ბაღების სკოლამდელი ასაკის აღსაზრდელები კი სწავლების ონლაინფორმაზე 24 ნოემბრიდან გადადიან.