საკრებულოს ის დეპუტატები, რომლებიც თანამდებობაზე არჩეულები არ არიან, ხარჯს ამომრჩევლებთან ურთიერთობისთვის (მათი მოთხოვნების განხილვა, მათთვის ანგარიშის საჯაროდ წარდგენა), საკრებულოს კომისიებსა და ფრაქციებში მუშაობისთვის, საკრებულოს გადაწყვეტილებებისა და დადგენილებების პროექტების მომზადებისა და საკრებულოს წინაშე ანგარიშვალდებულ თანამდებობის პირებთან შეხვედრებისთვის მიიღებენ.

ზემოთ ჩამოთვლილი საქმიანობები „წარმომადგენლობით უფლებამოსილებებს“ განეკუთვნება.

2021 წლის მოწვევის საკრებულომ დეპუტატებზე ხარჯების ანაზღაურების წესი არასწორად დაადგინა, – ხარვეზი მთავრობის ადმინისტრაციამ გამოავლინა.

საკრებულოს დადგენილი ჰქონდა, რომ დეპუტატებს ყოველთვიურად 675 ლარი უნდა მიეღოთ მხოლოდ საკრებულოს, კომისიებისა და ფრაქციების სხდომებში მონაწილეობისთვის, ამომრჩევლებთან შეხვედრებისა და საკრებულოს თავმჯდომარის დავალებების შესრულებისთვის. ეს საქმიანობები „სადეპუტატო უფლებამოსილებებს“ განეკუთვნება.

დაკორექტირებული წესის მიხედვით, საკრებულოს არათანამდებობის პირ წევრებზე ხარჯი ანაზღაურდება შემდეგი საქმიანობისთვის:

  • საკრებულოს სხდომებზე დასწრება;
  • საკრებულოს გადაწყვეტილებების პროექტების მომზადება;
  • დადგენილების პროექტების ინიცირება;
  • საკრებულოს კომისიების, ფრაქციებისა და დროებითი სამუშაო ჯგუფების მუშაობაში მონაწილეობა;
  • საკრებულოს წინაშე ანგარიშვალდებული ორგანოსადმი პირადი კითხვით მიმართვა;
  • ამომრჩეველთა მიღება, მათი წერილების, წინადადებებისა და საჩივრების განხილვა;
  • ანგარიშის საჯარო განხილვა.

ჩამოთვლილი საქმიანობიდან ერთ-ერთის შეუსრულებლობის შემთხვევაში, ხარჯის ასანაზღაურებლად გასაცემი მაქსიმალური თანხა – 675 ლარი და 50 თეთრი, 5%-ით (33 ლარი) შემცირდება.

იმ შემთხვევაში, თუ დეპუტატი არც ერთ მოთხოვნას არ შეასრულებს, ხარჯი საერთოდ არ მიეცემა.

საკრებულოს წევრებმა გაწეული მუშაობის შესახებ ინფორმაცია საკრებულოს თავმჯდომარეს მოხსნებითი ბარათით ყოველი თვის 14 რიცხვში უნდა წარუდგინონ.

საკრებულოს, კომისიებისა და ფრაქციების სხდომებში დეპუტატების მონაწილეობას კი საკრებულოს აპარატი აღრიცხავს.

ამ საკითხს ხარაგაულის მუნიციპალიტეტის საკრებულო 4 აპრილის სხდომაზე განიხილავს.

ნინო კაპანაძე

ამავე თემაზე

რამ გამოიწვია სადეპუტატო ხარჯების 67 ათასი ლარით გაზრდა