„ჩემი ხარაგაულის“ ორმა ვიდეომ პოლონური ორგანიზაციისგან გამოცხადებულ კონკურსში გაიმარჯვა.

„სიტუაცია ვიდეოში, რომელმაც პირველი ადგილი დაიმსახურა, იყო ძალიან რთული არა მხოლოდ ჟურნალისტური, არამედ ადამიანური თვალსაზრისითაც, – აღნიშნა ჯილდოს გადმოცემისას კონკურსის ორგანიზატორმა აგნიეშკა ნოვინსკამ, – ძალიან მოკლე ფილმში რეპორტიორმა გადმოსცა ყველაფერი, რაც იმ სიტუაციაში შეიძლებოდა რომ გადმოეცა.

„ბრალდებულის სახლი გადაწვეს“ – ასე ეწოდება კონკურსში გამარჯვებულ ვიდეოფილმს (ავტორი ლაურა გოგოლაძე), რომელშიც ტრაგიკული შემთხვევაა ასახული.

კონკურსის ჯილდოები ასევე დაიმსახურა შოთა ლომიძისა და ნინო კაპანაძის მიერ მომზადებულმა ფილმმა, რომელიც ტრაგიკული შემთხვევის დროს დაზარალებულ 9 წლის ბიჭუნაზე გვიამბობს.

კონკურსი გამოცხადებული იყო ოთხ კატეგორიაში:

  • ვებგვერდი;
  • ვიდეომასალა ვებგვერდზე;
  • ფოტოსურათი ვებგვერდზე;
  • News-ი ვებგვერდზე.

ვებგვერდის კატეგორიაში გაიმარჯვა speqtri.ge; ვიდეომასალის კატეგორიაში – chemikharagauli.com; ფოტოსურათი ვებგვერდზე – sknews.ge; საუკეთესო ნიუსი – knews.ge

ლაურა გოგოლაძე დაჯილდოვდა ლეპტოპით, შოთა ლომიძე და ნინო კაპანაძე დაჯილდოვდნენ პლანშეტებით.

შოთა ლომიძე ასევე დაჯილდოვდა პოლონეთში სტაჟირებით. ვებგვერდის chemikharagauli.com – ის დიზაინერი და ადმინისტრატორი შოთა ლომიძე, შვიდი ქართული რეგიონული გამოცემის წარმომადგენელთან ერთად, 17 ოქტომბერს გაემგზავრება პოლონეთის ქალაქ კრაკოვში.

შარშან ანალოგიურ კონკურსში გამომცემლობამ „ჩემი ხარაგაული“ ფოტოს კატეგორიაში გაიმარჯვა; ხოლო „ჩემი ხარაგაულის“ გამომცემელი ლაურა გოგოლაძე, სამ ქართველ კოლეგასთან ერთად, – პოლონეთში სტაჟირებით დაჯილდოვდა.

კონკურსი პოლონურმა ასოციაციამ „დემოკრატიული აღმოსავლეთი“ და კავკასიის ჟურნალისტთა საერთაშორისო ცენტრმა ჩაატარეს პროექტის საქართველოს ადგილობრივი გაზეთები მობილურ სინამდვილეში“ ფარგლებში.

საუკეთესო ნამუშევრები გამოავლინა ჟიურიმ შემდეგი შემადგენლობით:

მარჩინ ბანკ – პროექტის მთავარი ტრენერი;

პიოტრ კრიშიაკი, იაროსლავ ბაბიცკი – პოლონური ადგილობრივი გაზეთების გამომცემლები;

კონსტანტინე სტალინსკი – დიზაინერი, ინფორმატიკოსი და პროგრამისტი;

ალიცია მოლენდა – პოლონური ადგილობრივი გაზეთის „პშელომ“ გამომცემელი, პოლონეთის ადგილობრივი გაზეთების ასოციაციის თავმჯდომარე.

პროექტი დაფინანსებულია პოლონეთის რესპუბლიკის საგარეო საქმეთა სამინისტროს 2015 წლის თანამშრომლობის განვითარების პროგრამის „დემოკრატიის მხარდაჭერა“ და თავისუფლების ფონდის პოლონურ-ამერიკული პროგრამა „ცვლილებები რეგიონში“ – RITA, რომელსაც ახორციელებს ფონდი განათლება დემოკრატიისთვის.

polonelebis-konkursi-2 polonelebis-konkursi-3

diplomi-polonetis