დღეს, პირველ ივნისს, ხარაგაულის მუნიციპალიტეტის საკრებულოს სხდომაზე დეპუტატებმა მორიგი საბიუჯეტო ცვლილება დაამტკიცეს.

კერძოდ,

ადგილობრივ ბიუჯეტში ასახეს ცენტრალური ბიუჯეტიდან მაღალმთიან სოფლებში გზების აღსადგენად და 2025 წლის თებერვალში დიდთოვლობით დაზარალებული ოჯახებისთვის გამოყოფილი თანხები;

203 ათასი ლარით გაუზარდეს სუბსიდია ხარაგაულის „დასუფთავებისა და კეთილმოწყობის გაერთიანებას“.

  • მაღალმთიანი დასახლებების განვითარების ფონდიდან მუნიციპალიტეტებს 13 619 240 ლარი გამოეყო; მათ შორის ხარაგაულის მუნიციპალიტეტს – 381 506 ლარი. მთავრობის 2026 წლის 30 აპრილის N878 განკარგულებაში აღნიშნულია, რომ ამ თანხიდან 200 000 ლარი სოფელ ბჟინევში გზის რეაბილიტაციისთვის (პირველი ეტაპი) განისაზღვრა, ხოლო 181 506 ლარი – სოფელ ზვარეში (ხიხაძეები, ორთოიძეები) საუბნო გზის რეაბილიტაციისთვის (პირველი ეტაპი);

 

  • 2025 წლის თებერვალში სტიქიური მოვლენების შედეგად დაზარალებული ოჯახებისათვის მთავრობის სარეზერვო ფონდიდან მუნიციპალიტეტებს 15 750 000 ლარი გამოეყო. მათ შორის ხარაგაულის მუნიციპალიტეტს – 630 000 ლარი. მთავრობის 2026 წლის პირველი მაისის N886 განკარგულებაში აღნიშნულია, რომ თანხა უნდა გაიცეს სტიქიური მოვლენების შედეგად დაზარალებულ იმ ოჯახებზე, რომელთა საკუთრებაში რეგისტრირებული საცხოვრებელი სახლები სრულიად დაინგრა ან არ ექვემდებარება აღდგენას.

ხარაგაულის მუნიციპალიტეტის მერის პირველი მოადგილის, ვარლამ ჭიპაშვილის ინფორმაციით, მერიას 2025 წლის თებერვალში სტიქიით დაზარალებულმა 16-მა ოჯახმა მიმართა. ვარლამ ჭიპაშვილი ამბობს, რომ მოქალაქეთა განცხადებებს მუნიციპალიტეტში მოქმედი სპეციალური კომისია შეისწავლის და თითოეული ოჯახისთვის გასაცემი თანხის ოდენობას საცხოვრებელი სახლების დაზიანების ხარისხის მიხედვით განსაზღვრავს.

  • ხარაგაულის „დასუფთავებისა და კეთილმოწყობის გაერთიანება“ დამატებით 203 ათას ლარს მიიღებს, მათ შორის:

ა) დასუფთავებისა და ნარჩენების გატანისთვის – 152 ათას ლარს. ეს თანხა შემდეგნაირად განაწილდება: გზების შეკეთება და მეწყერისაგან სავალი გზების გასაწმენდად – 60 ათასი ლარი; სანიაღვრე არხებისა და ცხაურების მოსაწყობად – 20 ათასი ლარი; საამშენებლო მასალების შესაძენად 20 ათასი ლარი; საწვავ-საპოხი მასალების გაძვირების გამო – 25 ათასი ლარი; სამხარაულიდან ექსპერტის მოსაწვევად – 3 ათასი ლარი; მუნიციპალიტეტის სოფლებში დასუფთავების თანამშრომლების (მეეზოვები, მუშები) შრომის ანაზღაურებისათვის 24 ათასი ლარი;

ბ) გარე განათების ქსელის ექსპლუატაციისთვის დამატებით საჭიროა – 35 ათასი ლარი – ელექტროენერგიის ფასისა და გარე განათების ქსელის გაზრდის გამო – 20 ლარი; გარე განათების ქსელის რეაბილიტაციისათვის საჭირო მილების და დამხმარე მასალების შესაძენად – 15 ათასი ლარი;

გ) 16 ათასი ლარი საჭიროა პარკის მომვლელების შრომის ანაზღაურებისათვის.

დასუფთავებისა და კეთილმოწყობის გაერთიანების სუბსიდია 203 ათასი ლარით 2026 წლის პირველ იანვარს არსებული საკუთარი საბიუჯეტო სახსრების თავისუფალი ნაშთის ხარჯზე გაიზრდება.

ამავე საბიუჯეტო ცვლილების თანახმად, ხარაგაულში ახალშობილებზე ერთჯერადი დახმარების თანხა იზრდება, ხარაგაულში ჯანდაცვის ცენტრის სახურავის რეაბილიტაციისთვის 68 500 გამოიყო. 

ამავე თემაზე დაგაინტერესებთ

ხარაგაულის საკრებულომ სხდომის პირდაპირ ეთერში გადაცემას მხარი არ დაუჭირა