ხარაგაულის მუნიციპალიტეტის მერია სოციალურ ქსელში ინფორმაციას ავრცელებს, მდინარე ყარნებას კალაპოტის გაწმენდით სამუშაოებთან დაკავშირებით.

ამ ინფორმაციას გთავაზობთ უცვლელად:

„ხარაგაულში, მდინარე ყარნებას ხეობაში მიწის მასის ჩამოშლის შედეგად წარმოქმნილი დაგუბებების აღმოფხვრისა და მდინარის კალაპოტის გახსნის მიზნით, გაწმენდითი სამუშაოები აქტიურად მიმდინარეობს. მიმდინარე სამუშაოებს ხარაგაულის მერი კობა ლურსმანაშვილი გაეცნო. მისი თქმით, პროცესის მართვაში ყველა სახელმწიფო უწყება აქტიურად არის ჩართული.

„ამ ეტაპზე მიმდინარეობს ჩამოშლილი მასის დადაბლება. მიწის მასა ისე ნაწილდება, რომ წყლის დონის მომატებისას თავიდან ავიცილოთ დამატებითი რისკების წარმოქმნა. რკინიგზის დეპარტამენტმა უკვე გაწმინდა მდინარე ყარნებას კალაპოტი, ადგილზე მუშაობს საავტომობილო გზების დეპარტამენტის კონტრაქტორი კომპანიის ტექნიკა. ამასთან, ტერიტორიაზე სამაშველო სამსახური მუდმივ რეჟიმში ახორციელებს მონიტორინგს, პროცესში აქტიურად არიან ჩართული საპატრულო პოლიცია და მერიის წარმომადგენლები. მინდა, მადლობა გადავუხადო ყველა სახელმწიფო უწყებას,“- ამბობს კობა ლურსმანაშვილი.

დამეწყრილ ზონაში სამუშაოები სპეციალისტების რეკომენდაციების გათვალისწინებით ხორციელდება, რათა რისკების მინიმუმამდე იყოს დაყვანილი და უზრუნველყოფილი იქნას მოსახლეობის უსაფრთხოება“, – ნათქვამია ხარაგაულის მუნიციპალიტეტის მერიისგან გავრცელებულ განცხადებაში.

მთის ამბების მიერ მოკვლეული და გავრცელებული ინფორმაციით,  მეწყერი, რომელმაც სოფლები ღვერკი, ხემაღალი დაანგრია და მდინარე ყარნებას დაგუბებით საფრთხეს უქმნის ლაშეს, ჩხერიმელას ხეობის სხვა სოფლებს, თბილისი-ბათუმის სარკინიგზო მაგისტრალს, როგორც მთის ამბების მიერ შეგროვებული მასალებით ირკვევა, დაკავშირებულია ჩინური კომპანიის მიერ რკინიგზის მოდერნიზების სამუშაოებთან. გვირაბის გასაჭრელად და რკინიგზის გასაფართოებლად მთას დიდი ხნის განმავლობაში აფეთქებდნენ, სოფლებიც მეწყერსაშიში სწორედ ამ პერიოდში გახდა.

ხარაგაულის სოფლებში განვითარებული მეწყერის შესახებ მთის ამბების რეპორტაჟის ნახვა შეგიძლიათ ბმულზე.