„სამოქალაქო ბიუჯეტირების პროგრამა 2024“-ის გამარჯვებული შვიდი პროექტის საპროექტო-სახარჯთაღრიცხვო დოკუმენტაციამ ექსპერტიზა გაიარა. ეს დოკუმენტაციები შპს-მ „სტუდია არქი“ (დირექტორი ნიკა ბაშინურიძე) 4 370 ლარად მოამზადა.

ხარაგაულის მერის პირველი მოადგილე ვარლამ ჭიპაშვილი ვარაუდობს, რომ პროექტების განხორციელებისთვის ტენდერი მაისის ბოლომდე აუცილებლად გამოცხადდება.

„სამოქალაქო ბიუჯეტირება 2024“-ის გამარჯვებული პროექტებია:

  • საღანძილეში საბავშვო სკვერის მოწყობა (იდეის ავტორი საბა ყრუაშვილი),
  • ბორითში ახალგაზრდული სკვერის მოწყობა (იდეის ავტორი ნია გორგაძე),
  • ვახანში საჭიდაო მოედნის გადახურვა (იდეის ავტორი ლაშა ღონღაძე),
  • ვარძიაში გარე განათების ქსელის მოწყობა (იდეის ავტორი კობა კვირიკაშვილი),
  • ღორეშაში საბავშვო სკვერის მოწყობა (იდეის ავტორი ქეთევან კოპაძე),
  • სარგვეშში წყაროს რეაბილიტაცია (იდეის ავტორი თეონა ვეფხვაძე),
  • ზვარეში სპორტული მოედნის მოწყობა (იდეის ავტორი შალვა ორთოიძე). თითოეული პროექტის განსახორციელებლად მაქსიმუმ 30 ათასი ლარია განსაზღვრული.

„სამოქალაქო ბიუჯეტირების პროგრამა“ ხარაგაულში 2022 წელს გერმანიის საერთაშორისო თანამშრომლობის საზოგადოების (GIZ) მხარდაჭერით დაინერგა. 2022–2023 წლებში ამ პროგრამით ხარაგაულის მუნიციპალიტეტში ცხრა პროექტი განხორციელდა.