ხარაგაულის მუნიციპალიტეტის სოფლების – ხუნევისა და გედსამანიის მოსახლეობა რიკოთის ავტობანზე ასასვლელ-ჩამოსავლელის ხუნევში მოწყობას, მესამე წელია, უშედეგოდ ითხოვს.

მოქალაქეები ამბობენ, რომ ავტობანის მშენებლობის დაწყების დღიდან მუდმივად ინტერესდებოდნენ, ხომ არ გართულდებოდა მათთვის მგზავრობა.

ხელისუფლებისგან დაპირებების მიუხედავად, რიკოთის ავტობანის გახსნის შემდეგ, ხუნევი და გედსამანია, ფაქტობრივად, ჩიხში აღმოჩნდა. ამ სოფლებში მაცხოვრებლებისთვის ავტობანზე ასასვლელ-ჩამოსასვლელი 5-დან 9 კილომეტრამდე მანძილითაა დაშორებული.

ხუნევსა და გედსამანიაში მცხოვრები 242 პირის ხელმოწერილი წერილი ხუნევში მცხოვრებმა მარინა ლომიძემ საავტომობილო გზების დეპარტამენტში 16 სექტემბერს პირადად ჩაიტანა. მას უთხრეს, რომ წერილზე პასუხს ათ სამუშაო დღეში მიიღებდა. მას შემდეგ სამი თვე გავიდა. მოსახლეობას კი წერილობითი პასუხი ამ დრომდე არ მიუღია. ქალბატონი მარინა ამბობს, რომ საავტომობილო გზების დეპარტამენტში მას აღარც სატელეფონო ზარებზე პასუხობენ.

წერილში აღნიშნულია, რომ „ხუნევის თემის ორი სოფელი გარესამყაროს მოწყვეტილია და მოსახლეობას თავისუფლად გადაადგილების შესაძლებლობა შეეზღუდა. მგზავრობა გაურთულდა ხუნევისა და გედსამანიის სკოლების იმ პედაგოგებს, რომლებიც ამ სკოლებში მეზობელი მუნიციპალიტეტებიდან დადიან.

უგზოობის გამო, ოჯახები სოფელს ტოვებენ და სამსახურის საშოვნელად ქალაქებში ან ევროპის სხვადასხვა ქვეყნებში მიდიან. ზამთრის პერიოდში განსაკუთრებით ვწყდებით გარესამყაროს. ჩვენ ვითხოვთ მაგისტრალთან დამაკავშირებელ გზას. სოფელ ხუნევის ტერიტორიაზე შესაძლებელია ავტობანთან დამაკავშირებელი გზის მოწყობა“, – ნათქვამია წერილში.

„ხუნევიდან ვერტყვიჭალაში თუ არ ჩავედით, ვერც ავტობანს ვუკავშირდებით და ვერც სხვა სოფლებს, – ამბობს ხუნევში მცხოვრები მარინა ლომიძე, – მივმართეთ ხარაგაულის მუნიციპალიტეტის მერიას. 2023 წლის იანვარში ჩაატარეს კრება და დაგვპირდნენ, რომ საკითხს მოაგვარებდნენ. თუმცა, შედეგს ვერ ვხედავთ“.

ხარაგაულის მუნიციპალიტეტის ადგილობრივმა ხელისუფლებამ, 2023 წელს უბისიდან ხუნევის მიმართულებით მუნიციპალური ტრანსპორტი დანიშნა. თუმცა, როგორც ხუნევში მცხოვრები ზაირა გელაშვილი ამბობს, მუნიციპალური ტრანსპორტი მათ საჭიროებებზე მორგებული ვერ არის. ავტობანზე მოსახვედრად მათ ვერტყვიჭალაში ჩასასვლელად 8-9 კილომეტრის გავლა უწევთ. ვერტყვიჭალაში ჩასულებმა კიდევ ერთ კილომეტრამდე მანძილი უნდა გაიარონ, ავტობანზე რომ ავიდნენ.

ვერტყვიჭალაში მცხოვრები ჯემალ მუმლაძე ამბობს, რომ სხვა ქალაქებიდან მომავალი საზოგადოებრივი ტრანსპორტის ნაწილი მგზავრების ასაყვანად, ავტობანიდან ვერტყვიჭალაში არ ჩამოდის.

„ხალხი ძალიან ცუდ დღეშია, თუ დასაქმებულმა ადამიანმა მთელი ხელფასი ტრანსპორტირებაში დახარჯა, რაღა გამოვიდა“, – ამბობს ჯემალ მუმლაძე და უერთდება ხუნევ-გედსამანიის მოსახლეობის მოთხოვნას, ხუნევში რიკოთის ავტობანზე ასასვლელ-ჩამოსასვლელი კვანძი რომ მოეწყოს.

ხუნევში მცხოვრები მამუკა ლომიძე ამბობს, რომ „ვერტყვიჭალაში, ავტობანზე წვალებით ასულ ადამიანებს მოსაცდელი არ აქვთ, უამინდობის დროს თავი რომ შეაფარონ. ხუნევისა და გედსამანიის მოსახლეობის მოთხოვნები ამ ავტობანის მშენებლობისას არ გაითვალისწინეს; ძველი საავტომობილო გზა კი მიწის საყარად და სანაგვედ იქცა“.

„გაუსაძლის მდგომარეობაში ვართ, – თანასოფლელთა გულისტკივილს უერთდება ხუნეველი როინ ლომიძე, – სამყაროს მოვწყდით, ყურადღება მოგვაქციონ. გამგეობიდან, საავტომობილო გზების დეპარტამენტიდან გვპირდებოდნენ, რომ ავტობანიდან ალტერნატული შემოსასვლელი გზა ხუნევს გვექნებოდა. აღარ ვიცით, ვის მივმართოთ, პატრონი ხომ უნდა გვყავდეს“?!

ამ პრობლემას „ჩემი ხარაგაულის“ რედაქცია, წელიწადზე მეტია, აშუქებს. 2023 წლის ნოემბერში ჩვენთან ინტერვიუში ხარაგაულის მუნიციპალიტეტის მერმა, კობა ლურსმანაშვილმა აღნიშნა, რომ საავტომობილო გზების დეპარტამენტში განიხილებოდა ხუნევში რიკოთის ავტობანზე ასასვლელ-ჩამოსასვლელის მოწყობის საკითხი – კონკრეტულად, მდინარის კალაპოტის გაყოლებით, ნადაბურის გადასახვევთან წრიულამდე უნდა გაკეთებულიყო ახალი გზა, რომლითაც ხუნევისა და გედსამანიის მოსახლეობა ავტომაგისტრალზე მოხვდებოდა.

ამ სტატიის მომზადების პროცესში, 2024 წლის 29 ნოემბერს ხარაგაულის მუნიციპალიტეტის მერს წერილობით მივმართეთ იმის გასარკვევად, თუ რა ეტაპზეა ხუნევში ავტობანთან დამაკავშირებელი კვანძის მოწყობის საკითხი, რა ინფორმაციას ფლობს საავტომობილო გზების დეპარტამენტიდან. ამავე საკითხზე წერილობითი პასუხი მოვითხოვეთ საავტომობილო გზების დეპარტამენტიდანაც. არც ერთი უწყებიდან პასუხები კანონით დადგენილ ვადებში არ მიგვიღია.

ნინო კაპანაძე

ვიდეო სოციალურ ქსელში

ამავე თემაზე დაგაინტერესებთ

ავტობანიდან ჩამოსასვლელი ხარაგაულს ძალიან დააშორეს

ხუნეველების გასაჭირი