საქართველოს მთავრობამ პარლამენტს 2025 წლის ბიუჯეტის პროექტის

პირველადი ვერსია წარუდგინა.

2025 წლიდან საქართველოში 70 წელს ზემოთ მოსახლეობის პენსიები მინიმუმ 450 ლარამდე უნდა გაიზარდოს. ამის შესახებ ინფორმაცია ფინანსთა სამინისტროს განმარტებით ბარათშია მოცემული, რომელიც 2025 წლის სახელმწიფო ბიუჯეტის პროექტს ახლავს.

განმარტებითი ბარათის თანახმად, 2025 წლის სახელმწიფო ბიუჯეტში ჯანდაცვისა და სოციალური დაცვის პროგრამების დასაფინანსებლად დაფინანსება გაზრდილია 870,0 მლნ ლარზე მეტით, რომლის ფარგლებში გათვალისწინებულია:

  • 70 წლის და მეტი ასაკის პენსიონერთა პენსია იზრდება 35 ლარით და განისაზღვრება 450 ლარის ოდენობით. ამავე კატეგორიის პენსიონერთა პენსია მაღალმთიან დასახლებებში თითქმის 540 ლარს გაუტოლდება;
  • 70 წლამდე პირთა პენსია იზრდება 20 ლარით და განისაზღვრება 335 ლარის ოდენობით, ხოლო მაღალმთიან დასახლებებში 400 ლარს გადააჭარბებს;
  • გარდა პენსიისა, გათვალისწინებულია მკვეთრად გამოხატული და 18 წლამდე შშმ პირების სოციალური გასაცემლის ზრდა 35 ლარით, ხოლო დანარჩენი კატეგორიის შშმ პირთა გასაცემლის ზრდა 20 ლარით;
  • ჯამში სოციალური პროგრამების დაფინანსება შეადგენს 6,3 მილიარდ ლარს;
  • ჯანდაცვის პროგრამების დასაფინანსებლად გამოყოფილია 1,9 მილიარდ ლარზე მეტი, მათ შორის გათვალისწინებულია პირველადი ჯანდაცვის პერსონალის ხელფასების 10%-იანი ზრდა;
  • დევნილთა სახლებით უზრუნველყოფის მიზნით გათვალისწინებულია 240,0 მლნ ლარი.

განმარტებით ბარათში ასევე ნათქვამია, რომ „წარმოდგენილი ბიუჯეტის პროექტი არის 2025 წლის ბიუჯეტის პირველადი ვარიანტი. მომდევნო 3 თვის განმავლობაში, ერთის მხრივ, განხორციელდება მაკროეკონომიკური დინამიკის ანალიზი, აქტიური კონსულტაციები გაიმართება ახალარჩეულ პარლამენტთან და შესაბამისად მოხდება ბიუჯეტის საბოლოო ვარიანტის ფორმირება“.