იმისთვის, რომ აქტიურად ჩავერთოთ ადგილობრივი პრობლემების მოგვარებაში, საჭიროა ვიცოდეთ რა უფლებამოსილებები აქვს მუნიციპალიტეტს და მონაწილეობის რა გზები და საშუალებები არსებობს.

რა არის მუნიციპალიტეტი?

თავდაპირველად მოკლედ გაგაცნობთ რა არის მუნიციპალიტეტი – ესაა თვითმმართველი ქალაქი ან დასახლებათა ერთობლიობა (ქალაქი, დაბა, სოფელი), რომელსაც აქვს ადმინისტრაციული საზღვრები, ჰყავს არჩევითი, წარმომადგენლობითი და აღმასრულებელი ორგანოები, ადგილობრივი რეგისტრირებული მაცხოვრებლები და აქვს ქონება, ბიუჯეტი, შემოსულობები.

ადგილობრივი მოსახლეობა ირჩევს მუნიციპალიტეტის საკრებულოს და მერს, რომელთა მთავარი ფუნქცია ადგილობრივი საკითხების მოგვარებაა. თვითმმართველობის საშუალებით, ადგილობრივი მნიშვნელობის საკითხების მოგვარება მოქალაქის კონსტიტუციური უფლებაა!

მუნიციპალიტეტის უფლებამოსილებები:

ცენტრალური ხელისუფლების და ადგილობრივი თვითმმართველობის უფლებამოსილებები გამიჯნულია ერთმანეთისგან და ისინი თავიანთი კომპეტენციის ფარგლებში აწესრიგებენ სხვადასხვა საკითხებს.

ცალკეული მიმართულებების მიხედვით მუნიციპალიტეტის საკუთარ

უფლებამოსილებებს წარმოადგენს:

  • საფინანსო-საბიუჯეტო უფლებამოსილებები და ქონების განკარგვა;
  • მუნიციპალიტეტის სივრცითი დაგეგმვა;
  • დასუფთავება და გარემოს დაცვა;
  • ინფრასტრუქტურის განვითარება;
  • განათლება;
  • სპორტი, კულტურა, ახალგაზრდობა;
  • ჯანმრთელობის დაცვა და სოციალური უზრუნველყოფა.

მუნიციპალიტეტი უფლებამოსილია საკუთარი ინიციატივით გადაწყვიტოს ნებისმიერი საკითხი, რომლის გადაწყვეტაც საქართველოს კანონმდებლობით არ არის ხელისუფლების სხვა ორგანოს უფლებამოსილება და აკრძალული არ არის კანონით. ასეთი უფლებამოსილებები შეიძლება იყოს:

  • დასაქმების ხელშეწყობა;
  • სოფლის მეურნეობის (მათ შორის, სასოფლო-სამეურნეო კოოპერაციის) მხარდაჭერა;
  • ტურიზმის განვითარება,
  • მოსახლეობის სოციალური დახმარება;
  • ახალგაზრდული პოლიტიკის განვითარების ხელშეწყობა;
  • ბავშვის დაცვა და მხარდაჭერა;
  • მასობრივი სპორტის ხელშეწყობა;
  • გარემოს დაცვა;
  • საზოგადოებრივი განათლება;
  • გენდერული თანასწორობის ხელშეწყობა;
  • ქალთა მიმართ ძალადობისა ან/და ოჯახში ძალადობის პრევენცია;
  • ქალთა მიმართ ძალადობისა ან/და ოჯახში ძალადობის მსხვერპლთა დაცვა და დახმარება;
  • ადგილობრივი მნიშვნელობის არქივის წარმოება;
  • ცხოვრების ჯანსაღი წესის დამკვიდრება;
  • ადამიანის ჯანმრთელობისათვის უსაფრთხო გარემოს შექმნა;
  • მუნიციპალიტეტის ტერიტორიაზე ინვესტიციების მოზიდვა;
  • ინოვაციური განვითარების მხარდაჭერა;
  • სხვა.

აღნიშნული მასალა მომზადებულია საინფორმაციო კამპანიის, „ჩაერთე მართვაში“ ფარგლებში, რომელსაც სამოქალაქო საზოგადოების ინსტიტუტი (CSI) USAID-ის ადგილობრივი თვითმმართველობის პროგრამის მხარდაჭერით ახორციელებს.

ამავე თემაზე

მოქალაქემ ყველაზე უკეთ იცის, რა პრობლემებია თემში, სადაც ცხოვრობს