საქართველოს პარლამენტის თავმჯდომარე კახაბერ კუჭავამ ევროკავშირის დროშა, რომელიც პრაიდის მოწინააღმდეგეებმა გუშინ ჩამოხსნეს, ამ დილით პარლამენტის წინ თავად აღმართა.

ამის ამსახველ ფოტოებსა და ინფორმაციას სოციალურ ქსელში თვითონ კახაბერ კუჭავა ავრცელებს.

საქართველოს პარლამენტის თავმჯდომარე აცხადებს, რომ ევროკავშირი საქართველოს სტრატეგიული პარტნიორია და ევროკავშირის დროშის დაშვება არის მიუღებელი.

„ევროპულ და ევროატლანტიკურ სტრუქტურებში ინტეგრაცია ქართველი ხალხის ისტორიული არჩევანია და ამ გზაზე აუცილებლად ვივლით წინ!

მიუღებელია ევროკავშირის დროშის დაშვება. ჩვენი სტრატეგიული პარტნიორები საქართველოს სუვერენიტეტისა და ტერიტორიული მთლიანობის სადარაჯოზე მუდმივად დგანან. მათი წვლილი საქართველოს განვითარებაში ფასდაუდებელია.
უნდა გვახსოვდეს, რომ ჩვენ, ყველას, ერთი სამშობლო გვაქვს, რომლის ისტორიას, ტრადიციებსა და რელიგიას არაფერი აქვს საერთო ძალადობასთან“, – აცხადებს კახაბერ კუჭავა სოციალური ქსელით.