დღეს, 20 მაისს, საქართველოს სკოლებში მეთორმეტეკლასელებისათვის ბოლო ზარი დაირეკა.

ხარაგაულის მუნიციპალიტეტში სკოლა 138 მოსწავლემ დაამთავრა. პანდემიის გამო მეთორმეტეკლასელები სკოლებს მოკრძალებული ღონისძიებებით დაემშვიდობებიან.

ლაშისა და წყალაფორეთის საჯარო სკოლას წელს თითო-თითო მეთორმეტეკლასელი ამთავრებს. ყველაზე მეტი კურსდამთავრებული წელს ხარაგაულის #3 საჯარო სკოლას ჰყავს – ამ სკოლას 16 მეთორმეტეკლასელი ემშვიდობება.

ხარაგაულის #3 საჯარო სკოლის კურსდამთავრებულ ანი მეიფარიანისთვის სკოლის დამთავრება მომავლისკენ გადადგმულ დიდ ნაბიჯს ნიშნავს.

„ცხოვრების ახალ ეტაპზე გადავდივარ. მიხარია, რომ ასეთ კარგ სკოლაში ვსწავლობდი. თითოეულ პედაგოგს ჩვენზე ძალიან დიდი ამაგი აქვს  და მგონია, რომ უნივერსიტეტში მომზადებულები მივდივართ“, – ამბობს ანი მეიფარიანი.

„სკოლის დამთავრების შემდეგ ჩვენს ცხოვრებაში ძალიან ბევრი რამე იცვლება, ვხვდებით ზრდასრული ადამიანები, გვაქვს უფრო მეტი უფლებები და მეტი პასუხისმგებლობები,“ – ამბობს ხარაგაულის #2 საჯარო სკოლის კურსდამთავრებული გიგა ხიჯაკაძე.

„ყველა ჩემს თანატოლს ვუსურვებ ძალიან დიდ წარმატებას ცხოვრებაში, იმედი მაქვს, რომ ავიხდენთ იმ სურვილებს, რაც მთელი გულით გვსურს,“ – ამბობს ხარაგაულის #3 საჯარო სკოლის კურსდამთავრებული ანა კვინიკაძე.