ეს ინფორმაცია ხარაგაულის საავადმყოფოს კლინიკურმა მენეჯერმა მაკა ქასრაშვილმა მოგვაწოდა.

15 თებერვლიდან ხარაგაულის საავადმყოფო პაციენტებს ყოველდღე, წინასწარი ჩაწერის გარეშე, მოემსახურება.

მაკა ქასრაშვილის ინფორმაციით, ხარაგაულის საავადმყოფოში პაციენტები ყოველდღიურად პედიატრის, თერაპევტის, კარდიოლოგის, ქირურგის, ფთიზიატრის, ნევროლოგის, ოფთალმოლოგის, გინეკოლოგისა და ოჯახის ექიმის მომსახურებას მიიღებენ.

ენდოკრინოლოგი, საქალაქთაშორისო ტრანსპორტის შეზღუდვის გამო, ხარაგაულის საავადმყოფოში მისულ პაციენტებს კონსულტაციას დისტანციურად – ორშაბათსა და ოთხშაბათს გაუწევს.

„პატარა კლინიკებმა კორონავირუსთან ბრძოლაში თავისი ფუნქცია შეასრულეს და ახლა, რადგან ინფიცირებულთა რაოდენობა მცირდება, მუშაობის ჩვეულ რეჟიმს ვუბრუნდებით, – ამბობს მაკა ქასრაშვილი, – ამჟამად ხარაგაულის კლინიკაში ხუთი კოვიდინფიცირებულია.

დღეიდან ტაქსის მძღოლების ტესტირება დავიწყეთ. მათ სწრაფი ტესტი ყოველ ორ კვირაში ერთხელ ჩაუტარდებათ“.

ხარაგაულის საავადმყოფო 2020 წლის ოქტომბრიდან ამ დრომდე, კორონავირუსით ინფიცირებულებს ემსახურებოდა.