რიკოთის ავტობანის მშენებელ კომპანიას ვერტყვიჭალასა და ბორითში მიწის ნაკვეთებს ხარაგაულის მუნიციპალიტეტის თვითმმართველობა იჯარით გადასცემს.

ვერტყვიჭალაში 1 085 კვმ არასასოფლო-სამეურნეო დანიშნულების მიწის ნაკვეთზე მშენებელმა კომპანიამ სანაყარო უნდა მოაწყოს. წელიწადში ის ამ ფართის დაქირავებისთვის 2 424 ლარს გადაიხდის.

ბორითში 599 კვმ მიწის ნაკვეთზე სამშენებლო კონსტრუქცია მოეწყობა. მიწის ამ ფართობის წლიური გადასახადი 1 932 ლარია.

მერიის ეკონომიკისა და ქონების მართვის სამსახურის უფროსის მოვალეობის შემსრულებლის, მაია ალავიძის ინფორმაციით, მიწის ფართობების ღირებულება აუდიტის სამსახურმა შეაფასა, ხოლო იჯარის წლიური თანხა – საერთო ღირებულების 6% – საკრებულომ დაამტკიცა.

მიწის ნაკვეთებს მშენებელი ორი წლის ვადით გამოიყენებს. სამუშაოების დასრულების შემდეგ კი ის ვალდებული იქნება, მათ პირვანდელი სახე დაუბრუნოს.

ხევი-უბისას გზის მონაკვეთს ჩინური კომპანია „Hunan Road and Bridge Construction Group“ ახორციელებს.

ეს საკითხი დღეს, პირველ თებერვალს, ხარაგაულის მუნიციპალიტეტის საკრებულოს ბიუროს სხდომაზე განიხილეს. საბოლოო გადაწყვეტილებას 4 თებერვლის საკრებულოს სხდომაზე მიიღებენ.

ნინო კაპანაძე