დღეს, 22 იანვარს, საკოორდინაციო საბჭოს სხდომის დასრულების შემდეგ ვიცე-პრემიერმა მაია ცქიტიშვილმა განაცხადა, რომ პირველი თებერვლიდან

  • საქალაქთაშორისო მიკროავტობუსებისა და სამგზავრო მატარებლების  მოძრაობა არ განახლდება;
  • სავაჭრო ცენტრები გაიხსნება;
  • მუნიციპალური ტრანსპორტის მოძრაობა აღდგება.

თუმცა, ამავდროულად, ძალაში კომენდანტის საათი – საღამოს 9 საათიდან დილის 5 საათამდე გადაადგილების შეზღუდვა, – ძალაში დარჩება.

საკოორდინაციო საბჭოს გადაწყვეტილებით, ძალაში დარჩა სათხილამურო კურორტებზე დაწესებული შეზღუდვებიც.

თებერვლიდან, ყველა ის შეზღუდვა, რაც დღეისათვის არის დაწესებული, შაბათ-კვირას ძალაში დარჩება.

ვიცე-პრემიერმა მაია ცქიტიშვილმა განაცხადა, რომ თბილისში, ქუთაისსა და რუსთავში მოქმედ სკოლებში სასწავლო პროცესის განახლება პირველი მარტიდან იგეგმება. სხვა ქალაქებში – ბათუმში, ზუგდიდში, გორში, ფოთსა და თელავში სკოლებში სწავლა პირველი თებერვლიდან განახლდება.

ძალაში რჩება ქორწილებისა და სხვა ხალხმრავალი სარიტუალო ღონისძიებების აკრძალვა.

პირველი მარტიდან დაგეგმილია საბავშვო ბაღების ფუნქციონირების განახლება, პროფესიულ და უმაღლეს სასწავლებლებში სწავლის ტრადიციული ფორმით აღდგენა. თუმცა, გათვალისწინებული იქნება ქვეყანაში არსებული ეპიდვითარება.