საზოგადოებრივი ორგანიზაცია „სამართლიანობის განვითარების ინსტიტუტის“ წარმომადგენლებმა  დღეს ხარაგაულში იმიტირებული საარჩევნო უბანი მოაწყვეს.

ამ ორგანიზაციის დამფუძნებელმა არჩილ სოფრომაძემ და ხარაგაულში წარმომადგენელმა ნინო ჭიპაშვილმა ქუჩაში გამვლელ ხარაგაულელებს არჩევნების დღეს საარჩევნო უბანზე ხმის მიცემის პროცედურები და პანდემიის პირობებში დადგენილი რეკომენდაციები გააცნეს.

მათ, აქცის ფარგლებში, ამომრჩევლებს აქტიურობისკენ მოუწოდეს, რადგან თითოეული ჩვენგანის ხმა გადამწყვეტია.

ცნობილია არაერთი ფაქტი, როცა არჩევნების შედეგი სწორედ ერთმა ხმამ გადაწყვიტა.

ამიტომ ყოველთვის უნდა გვახსოვდეს, რომ თითოეულ საარჩევნო ხმას უდიდესი ძალა აქვს!

„სამართლიანობის განვითარების ინსტიტუტის“ წარმომადგენლებმა პროექტში ჩართულ ხარაგაულელებსა და ასევე გამვლელებს დაურიგეს საინფორმაციო ბუკლეტები.

პროექტი „ინფორმირებული ამომრჩეველი“ ცესკოსა და სწავლების ცენტრის დაფინანსებით, ხარაგაულში, საჩხერესა და ჭიათურაში მიმდინარეობს.

პროექტის მიზანია 2020 წლის 31 ოქტომბრის საპარლამენტო არჩევნების ჩატარებასა და მის უსაფრთხოებაზე ამომრჩეველთა ინფორმირება ისეთ მნიშვნელოვან საკითხებზე, როგორიცაა:
1) საკონსტიტუციო ცვლილების შედეგად საქართველოს ორგანული კანონის საარჩევნო კოდექსში შეტანილი ცვლილებები’
2) პანდემიის პირობებში არჩევნების უსაფრთხოება;
3) საარჩევნო ადმინისტრაციის მიერ გატარებული ღონისძიებები უსაფრთხო საარჩევნო გარემოს შექმნის მიზნით;
4) ამომრჩევლის უფლებებისა და ვალდებულებების შესახებ ინფორმირება;
5) ხმის მიცემის ფარულობა;
6) კენჭისყრის დღე.