ტყის ეროვნული აღრიცხვის საველე სამუშაოებს ოთხ რეგიონში – სამეგრელო-ზემო სვანეთში, იმერეთში, სამცხე-ჯავახეთსა და კახეთში, ტენდერში გამარჯვებული სამი კომპანია მაისის მეორე ნახევრიდან დაიწყებს.

ტყის მახასიათებლებზე მონაცემები შეგროვდება 1078 კლასტერზე (ერთი კლასტერი განსაზღვრული ზოლია, რომელიც სამ სანიმუშო ანუ საცდელ წერტილს მოიცავს).

ტყის ეროვნულ აღრიცხვას ბიომრავალფეროვნებისა და სატყეო დეპარტამენტი უხელმძღვანელებს. პარალელურად, ტყის საინფორმაციო და მონიტორინგის სისტემის ჩამოყალიბებაზე მიმდინარეობს მუშაობა.

ტყის ეროვნული აღრიცხვის სამუშაოებზე 24 მეტყევე და 24 სტუდენტი დასაქმდება.

საქართველოს ტყის ეროვნული აღრიცხვის მიზნებია:

  • ტყის ხარისხობრივი და რაოდენობრივი მახასიათებლების დადგენა ქვეყნის მასშტაბით;
  • ტყის მახასიათებლებზე უწყვეტი მონიტორინგისთვის ქსელის დაარსება;
  • კვლევების ხელშეწყობა და კვლევითი ინსტიტუტების გაძლიერება;
  • ანგარიშგება ეროვნულ, რეგიონულ და საერთაშორისო დონეზე;
  • პოლიტიკური და სტრატეგიული გადაწყვეტილებების მიმღებ პირთა სარწმუნო ინფორმაციით უზრუნველყოფა.

საქართველოს გარემოს დაცვისა და სოფლის მეურნეობის სამინისტრომ გერმანიის მთავრობის დახმარებით (GIZ) საქართველოს ტყის ეროვნული აღრიცხვა 2018 წელს დაიწყო.

2019 წელს, ტყის ეროვნული აღრიცხვის საველე სამუშაოები მცხეთა-მთიანეთში, გურიასა და აჭარაში განხორციელდა.