ხარაგაულის მუნიციპალიტეტის  სოფელ ვერტყვიჭალასა და საღანძილეში, ასევე ზესტაფონის მუნიციპალიტეტის სოფელ ქვედა საზანოში საბავშვო ბაღების მშენებლობა შეჩერებულია.

ამ სოფლებში ბაღებს ამხანაგობა „იმერეთი და ხურო“ აშენებს. ამხანაგობის დირექტორის, რუბენ ჩინჩალაძის, ინფორმაციით, ახალი კორონავირუსის პანდემიის გამო, ინფრასტრუქტურის სამინისტრომ ორ აპრილს ამ საბავშვო ბაღების მშენებლობის სამუშაოები შეაჩერა.

„სამივე საბავშვო ბაღში საძირკველის მშენებლობა უკვე დასრულებულია, მშენებლობის შეჩერებამდე კედლების ამოყვანა მიმდინარეობდა. როგორც კი სიტუაცია დასტაბილურდება და მუშაობის ნებართვას მოგვცემენ, მშენებლობას გავაგრძელებთ. ეს როდის იქნება, ჯერჯერობთ, არ ვიცით“, – ამბობს რუბენ ჩინჩალაძე.

სამივე საბავშვო ბაღის მშენებლობას მუნიციპალური განვითარების ფონდი აფინანსებს. ამხანაგობა „იმერეთი და ხურო“ ამ სამუშაოების განხორცილებას 2 182 ათას ლარად გეგმავს.

ფოტოზე: საღანძილის საბავშვო ბაღის მშენებლობა