გაერთიანებული წყალმომარგების კომპანიის აბონენტებმა ხარაგაულში დღეს, 30 მარტს, შემდეგი შინაარსის ტექსტური შეტყობინება მიიღეს:

-ახალი COVID-19-ის გავრცელების გამო ხარაგაულში მოსახლეობის სულადობრივი რაოდენობა შეიცვალა, რამაც წლის მოხმარების მოცულობის გაზრდა გამოიწვია. გამომდინარე აქედან, წყალი მოსახლეობას დილის 8:00 საათიდან 10:00 საათამდე, ხოლოს საღამოს – 18:00 სთ-დან 22:00 სთ-მდე მიეწოდება.

წყალმომარაგების გრაფიკის ცვლილებას მოსახლეობის გულისწყრომა მოჰყვა.

„ყველაფერს ვითვალისწინებ, ყველაფერს ვითავისებ. იქნებ ამიხსნას ვინმემ, ეს როგორ გავითავისო? რა ვქნა, რა შემიცვლის წყალს?“ – წელს სოციალურ ქსელში თამრიკო ფცქიალაძე.

კორონავირუსის პანდემიის დროს წყლის რაოდენობას კი არ უნდა გვიზღუდავდნენ, არამედ უფრო უნდა გაგვიხანგრძლივონ წყლის მოწოდების დრო, – წუხან ხარაგაულელები.

მოსახლეობას წყალი გრაფიკით 2019 წლის 7 ივნისს მომხდარი სტიქიის შემდეგ მიეწოდება – მოდიდებულმა მდინარემ ლეღვნის წყალსადენის მილები დააზიანა. დ. ხარაგაულის, საღანძილისა და დიდვაკის მოსახლეობა წყალს მას შემდეგ პატარა ხარაგაულში არსებული წყლის რეზერვუარებიდან იღებს. ამ დრომდე მათ წყალი დღეღამის განმავლობაში 4-5 საათით მიეწოდებოდათ.

გაერთიანებული წყალმომარაგების კომპანიამ ხარაგაულის წყალმომარაგების სისტემის რეაბილიტაციისთვის პროექტი 2019 წლის ოქტომბრის ბოლოს მოამზადა. როდის გამოცხადდება სამშენებლო სამუშაოებისთვის ტენდერი, – ამ შეკითხვით გაერთიანებული წყალმომარაგების კომპანიას მივმართეთ. პასუხს მიღებისთანავე გაცნობებთ.