ხარაგაულის მუნიციპალიტეტის საკრებულოს თავმჯდომარე მანანა ბარბაქაძე მერიიდან სრულყოფილ ინფორმაციას ითხოვს ააიპ-ებში სავარაუდო რეორგანიზაციის შესახებ.

„სხვა მუნიციპალიტეტებში, დიდი ხანია, ააიპ-ებმა წერილები მიიღეს მოსალოდნელი რეორგანიზაციის შესახებ, – განაცხადა საკრებულოს ფრაქცია „ქართული ოცნება-დემოკრატიული საქართველოს“ 29 იანვრის სხდომაზე მანანა ბარბაქაძემ, – კულუარულად მოვკარი ყური, რომ ხარაგაულში მერია ააიპ-ების რეორგანიზაცია-დამსხვილების პროცესს აპრილიდან იწყებს. ეს გაართულებს საქმეს. ოქტომბერში საპრეზიდენტო არჩევნებია დაგეგმილი. საკრებულომ უნდა იცოდეს, რას ფიქრობენ მერიაში ამ საკითხთან დაკავშირებით, რომელი ააიპ-ების დამსხვილებას აპირებენ.“

ინფორმაციის დასაზუსტებლად ხარაგაულის მუნიციპალიტეტის მერიის ადმინისტრაციული სამსახურის უფროსს, კახა გოლუბიანს, დავუკავშირდით. მისი განმარტებით, მერიაში ააიპ-ების რეორგანიზაციის საკითხი, ჯერჯერობით, არც განუხილავთ და არც რაიმე ოფიციალური დოკუმენტი შეუმუშავებიათ.