4 დეკემბერს რამდენიმესაათიანი მდუმარე აქცია გამართეს „ხარაგაულკეთილმოწყობის“ თანამშრომლებმა. ისინი ამ სამსახურის დირექტორ მიხეილ ჭიპაშვილის გათავისუფლებას აპროტესტებენ.

მათ განცხადებებით მიმართეს ხარაგაულის მუნიციპალიტეტის გამგებელ კობა ლურსმანაშვილს, საკრებულოს თავმჯდომარე ინგა მაღრაძესა და ჯანმრთელობისა და სოციალური დაცვის მინისტრ დავით სერგეენკოს.

„ბატონო დავით, – ნათქვამია ჯანდაცვის მინისტრისადმი გაგზავნილ მიმართვაში, – 30 ნოემბერს ხარაგაულის მუნიციპალიტეტის გამგებლის ბრძანებით დაკავებული თანამდებობიდან გაათავისუფლეს ა(ა)იპ „ხარაგაულკეთილმოწყობის“ დირექტორი მიხეილ ჭიპაშვილი.

აღნიშნული პიროვნება გამოირჩევა კოლეგიალობით, თანამშრომლებისადმი კეთილგანწყობითა და მეგობრული დამოკიდებულებით; ასევე საქმის საუკეთესო ცოდნითა  და შრომისმოყვარეობით.

ა(ა)იპ „ხარაგაულკეთილმოწყობის“ კოლექტივი მის გათავისუფლებას ვთვლით უსამართლოდ. გვიჩნდება განცდა, რომ უსამართლობის მსხვერპლი ნებისმიერი ჩვენგანი შეიძლება გავხდეთ.

ამასთან დაკავშირებით ხარაგაულის მუნიციპალიტეტის გამგებელს ვთხოვეთ განმარტება. გამგებლისგან გაკეთებულმა განმარტებამ კიდევ უფრო მეტად გაგვიმტკიცა უსამართლობისა და დაუცველობის განცდა.

ზემოთ აღნიშნული ფაქტიდან გამომდინარე, პროტესტის ნიშნად ვაპირებთ ორშაბათს, 7 დეკემბრიდან, გავიფიცოთ დირექტორის აღდგენის მოთხოვნით, ხარაგაულში ა(ა)იპ „ხარაგაულკეთილმოწყობის“ მიმდებარე ტერიტორიაზე. გაფიცვას ექნება მშვიდობიანი ხასიათი. შრომის კანონის მოთხოვნის თანახმად გატყობინებთ.“

მიმართვას ეთანხმება და ხელს აწერს „ხარაგაულკეთილმოწყობის“ 49 თანამშრომელი.

გამგებელ კობა ლურსმანაშვილისგან „ხარაგაულკეთილმოწყობის“ თანამშრომლები მოითხოვენ, რომ საკრებულოს 7 დეკემბერს დაგეგმილ სხდომაზე მან საჯაროდ განმარტოს მიხეილ ჭიპაშვილის თანამდებობიდან გათავისუფლების მიზეზი და ასევე მოითხოვენ მიხეილ ჭიპაშვილის აღდგენას სამსახურში.

საკრებულოს თავმჯდომარე ინგა მაღრაძისგან „ხარაგაულკეთილმოწყობის“ თანამშრომლები ითხოვენ 7 დეკემბერს დაგეგმილ სხდომაზე დასწრებისა და განცხადების გაკეთების ნებართვას.

ლაურა გოგოლაძე