მასწავლებლის ეროვნული ჯილდოს მფლობელი თბილისის N45 საჯარო სკოლის დაწყებითი საფეხურის მასწავლებელი მაგდა მიქაბერიძე გახდა.

ამ ჯილდოს მოსაპოვებლად ფინალში ასევე მოხვდნენ:

  • არჩილ თოდუა – ზუგდიდის N9 საჯარო სკოლის სამოქალაქო განათლების და მოქალაქეობის მასწავლებელი;
  • ეკატერინე ჩიქოვანი – თბილისის საერთაშორისო სკოლის ქართული ენისა და ლიტერატურის მასწავლებელი;
  • მადონა წერედიანი – მესტიის მუნიციპალიტეტის სოფელ ლატალის საჯარო სკოლის ქართული ენისა და ლიტერატურის მასწავლებელი;
  • ლაურა ჯიმშელეიშვილი – დამოუკიდებელი საერო გიმნაზიის „შავნაბადა“ ბიოლოგიისა და ბუნებისმეტყველების მასწავლებელი.

მასწავლებლის ეროვნული ჯილდოს 2026 წლის კონკურსზე 121 განაცხადი შევიდა. კონკურსანტები 17 წევრისგან დაკომპლექტებულმა ჟიურიმ შეარჩია: ჯერ საუკეთესო ათეული, ხოლო შემდეგ საუკეთესო ხუთეული გამოავლინა.

უკვე ათი წელია, მასწავლებლის ეროვნული ჯილდო ტარდება. ეს ინიციატივა მიზნად ისახავს განათლების სფეროში საუკეთესო და გამორჩეული მასწავლებლების გამოვლენას და მათ დაფასებას. გამარჯვებულს კონკურსის გენერალური სპონსორისგან – „გუდავაძე-პატარკაციშვილის ფონდისგან“ 15 000 ლარი გადაეცემა. ფინალისტებს კი მასწავლებლის ეროვნული ჯილდოს მთავარი მხარდამჭერი „საქართველოს ბანკი“ დააჯილდოებს.

2018 წელს „მასწავლებლის ეროვნული ჯილდოს“ ათეულში ხარაგაულის მუნიციპალიტეტის სოფელ ბაზალეთის საჯარო სკოლის დაწყებითი კლასების მასწავლებელი ნინო გურეშიძე შევიდა.  ფინალში კი ის „ჟიურის რჩეული“ გახდა.