ევროკავშირის უმაღლესი წარმომადგენელი, კაია კალასი და ევროკომისარი, მარტა კოსი „ქართული ოცნების“ მიერ მიღებულ ბოლოდროინდელ საკანონმდებლო ცვლილებებს ეხმიანება:

ახალი კანონმდებლობა, მათ შორის „უცხოეთის აგენტების რეგისტრაციის აქტი“ და „მაუწყებლობის შესახებ“ კანონი, რომელიც დღეს პარლამენტმა სათანადო საჯარო კონსულტაციების გარეშე მიიღო, საქართველოს ხელისუფლებას განსხვავებული აზრის დასათრგუნად და რეპრესიების პოლიტიკის გასამკაცრებლად დამატებით ინსტრუმენტებს აძლევს.

ეს კანონები სამოქალაქო აქტივისტების მუშაობას სტიგმატიზების რისკის ქვეშ აყენებს, საფრთხეს უქმნის სამოქალაქო საზოგადოებისა და დამოუკიდებელი მედიის არსებობის გაგრძელებას, უკან ხევს ადამიანის უფლებების დაცვას, არასათანადოდ ზღუდავს ფუნდამენტურ თავისუფლებებს და ძირს უთხრის დემოკრატიულ პრინციპებზე დაფუძნებულ გადაწყვეტილებების მიღებას.

ეს ნაბიჯები კიდევ უფრო მეტად არყევს დემოკრატიის საფუძვლებს საქართველოში. ასეთი ქმედებები არსებითად შეუთავსებელია ევროკავშირის ღირებულებებთან, როგორიცაა დემოკრატია, კანონის უზენაესობა და მედიის პლურალიზმი და შორს არის იმისგან, რასაც კანდიდატი ქვეყნისგან მოველით. ეს ნაბიჯები უარყოფითად იმოქმედებს საქართველოს ევროკავშირისკენ მიმავალ გზაზე. ევროკავშირის ამ ღირებულებების გაზიარება სავალდებულოა.

საქართველოს მოსახლეობის დიდ უმრავლესობას საქართველოს ევროკავშირში გაწევრიანება სურს. მოვუწოდებთ ხელისუფლებას, აჩვენოს, რომ ის ევროკავშირისკენ მიმავალ გზაზე სვლას ჭეშმარიტად და შეუქცევადად უბრუნდება. ამისთვის საჭიროა, რომ შეწყდეს მოქალაქეების მიმართ ძალადობა, გათავისუფლდნენ უსამართლოდ დაკავებულები, შეჩერდეს რეპრესიული კანონები, შედგეს ვენეციის კომისიასთან კონსულტაციები და გაიმართოს არსებითი დიალოგი სამოქალაქო საზოგადოებასთან და ყველა პოლიტიკურ აქტორთან მიმდინარე კრიზისიდან გამოსავლის მოსაძებნად.

საქართველოს დაბრუნება ევროკავშირში გაწევრიანების გზაზე სრულად ქვეყნის ხელისუფლების ხელშია.

ევროკავშირი მზად არის, მხარი დაუჭიროს საქართველოს მოსახლეობის ევროპულ მისწრაფებებს და საქართველოს დემოკრატიული, სტაბილური და ევროპული მომავლისკენ მიმართულ ყველა ძალისხმევას“, – ნათქვამია განცხადებაში.

საგაზაფხულო სესიის ფარგლებში, 1-ელ აპრილს „ქართულმა ოცნებამ“ პლენარულ სხდომაზე პარტიის მიერ ინიცირებული საკანონმდებლო ცვლილებები მესამე, საბოლოო მოსმენით, ერთხმად დაამტკიცა. ცვლილებების თანახმად, საქართველოს სისხლის სამართლის კოდექსს დაუბრუნდა „სამშობლოს ღალატის“ მუხლი. ამ მუხლს „სახელმწიფო ღალატი“ ერქვა და ის 2007 წლის აპრილში გაუქმდა.