საქართველოს მთავრობის 2023 წლის 5 დეკემბრის #2168 განკარგულებით, პროექტით – „ახალი წლის დღეები საქართველოში“ – 2023 წლის 24 დეკემბერს ხარაგაულში საახალწლო ღონისძიება გაიმართა.

მთავრობის 2023 წლის 19 დეკემბრის #2279 განკარგულებით, ხარაგაულის მუნიციპალიტეტის მერიას თანხმობა მიეცა, ამ საახალწლო ღონისძიებისთვის გამარტივებული შესყიდვის თაობაზე.

საახალწლო ღონისძიება 24 დეკემბერს 14:00 საათზე, ხარაგაულის კულტურისა და დასვენების პარკის შესასვლელთან დაიწყო, ორკესტრისა და კოსტუმირებული გმირების მსვლელობით, და 20:00 საათზე საზეიმო ფოიერვერკით დასრულდა.

ხარაგაულის მერსა და შპს „რუბიკონ გრუპთან“ 2023 წლის 20 დეკემბერს გაფორმებული ხელშეკრულების თანმხლები ინვოისიდან ირკვევა, რომ ამ საახალწლო ღონისძიებისთვის განკუთვნილი თანხა – 286 271 ლარი – შემდეგნაირად გაიხარჯა:

ა) გასართობი პროგრამა:

  • ანსამბლების – „რანინა“, „დუეტი ჯორჯია“, „სალიო და ბენდი“ – მომსახურება 26 020 ლარი დაგვიჯდა;
  • ღონისძიების წამყვანის მომსახურება – 3 252 ლარი;
  • დიჯეი – 1 500 ლარი;
  • ბარაბან შოუ (15 კაციანი) – 7 300 ლარი;
  • მონაწილეების ტრანსპორტორება და სასტუმროში განთავსება – 5 750 ლარი;
  • სანტა – 850 ლარი;
  • ელფები (ორი ელფი) – 1 950 ლარი;
  • ოჩოფეხები (ოთხი) – 2 800 ლარი;
  • საახალწლო ირმები (ორი) – 2 100 ლარი;
  • გნომები (ოთხი) – 2 600 ლარი;
  • თოვლის გუნდები (ორი) – 1 600 ლარი;
  • თეთრი დათვი (ექვსი) – 9 000 ლარი;
  • კოსტიუმირებული ჯანჯაფილის ორცხობილები (ორი) – 2 400 ლარი;
  • მასკოტები (ექვსი) – 4 020 ლარი;

ბ) საბავშვო აქტივობები:

  • საახალწლო ორცხობილების მოხატვა (100 ცალი) – 800 ლარი;
  • ნაძვის ხის სათამაშოს გაფერადება (100 ცალი) – 800 ლარი;
  • საახალწლო კერამიკის ფიგურების დამზადება (100 ცალი) – 900 ლარი;
  • კერამიკის ან ხის საახალწლო ფიგურების გაფერადება (100 ცალი) – 800 ლარი;
  • საახალწლო ქისების, მისალოცი ბარათების, ჯინჯერის სათამაშოების დამზადება (100 ცალი) – 800 ლარი;
  • სახის მოხატვა – 1 500 ლარი;
  • საკვები სივრცის მოწყობა (250 ც. კრეპი, 250 ც. ჰოთდოგი, 250 ც. გლინტვეინი, 250 ც. ცხელი შოკოლადი) – 10 000 ლარი;

გ) დეკორაცია/ინსტალაცია:

  • სანტას საახალწლო სახლი – 6 000 ლარი;
  • ლაპლანდიის მაკეტი – 5 000 ლარი;
  • საახალწლო ინსტალაცია განათებით (მოსასვენებელი სივრცისთვის ) – 10 000 ლარი;
  • აქტივობების მანიშნებელი (განათებული) – 2 850 ლარი;
  • ფოტოზონა ხის ჩარჩოთი და ნაძვის ხის სათამაშოებით – 4 500 ლარი;
  • შაპიტო საბავშვო აქტივობებისთვის – 5 000 ლარი;
  • საახალწლო ჯიხურის მოწყობა-გაფორმება (ექვსი ჯიხური) – 5 220 ლარი;
  • ქუჩის გირლანდები (400 მ) – 3 425 ლარი;
  • მოსასვენებელი სივრცის მოწყობა (პალეტები, მყარი პუფები, თემატურად მოხატული კასრები) – 3 500 ლარი;
  • კვების ჯიხური საახალწლო დეკორაციით – 3 500 ლარი;
  • სცენის დეკორაცია – 5 000 ლარი;
  • ფოიერვერკი – 4 000 ლარი;
  • ნაძვის ხეები (ორი) – 7 200 ლარი;
  • საახალწლო საჩუქრები ბავშვებისთვის (ქისა, შოკოლადები, ნაძვის ხის სათამაშო 150 ც.) – 2 550 ლარი;

დ) პოლიგრაფიული მომსახურება:

– ვიმპელები საახალწლო ვიზუალით – 6 000 ლარი;

ე) ტექნიკური აღჭურვილობა:

  • განათება, გახმოვანება, სცენა, გადახურვა – 20 000 ლარი;
  • ლიხტვაგენი – 2 500 ლარი;
  • გამათბობლები (ათი) – 3 000 ლარი;
  • ჯებირი – 1 200 ლარი;

ვ) საორგანიზაციო ჯგუფი

  • პროდაქშენ მენეჯერი/ლოკაციის მენეჯერი (ოთხი) – 10 408 ლარი;
  • გრაფიკოს-დიზაინერი – 5 204 ლარი;
  • მხატვარ-დეკორატორი – 2 602 ლარი;
  • ტექნიკური მენეჯერი (ორი) – 2 602 ლარი;
  • ტექნიკური პერსონალი (ოთხი) – 4 553 ლარი;
  • ფოტოგრაფის მომსახურება – 1 301 ლარი;
  • სამივლინებო ხარჯები – 3 691 ლარი;
  • ტრანსპორტირების ხარჯები – 13 500 ლარი.

აღსანიშნავია, რომ 2023 წლის 3 ნოემბერს კულტურისა და დასვენების პარკში გამართული „ხარაგაულობა“ 22 891 ლარი დაჯდა.

ასევე აღსანიშნავია, რომ კომპანია შპს „რუბიკონ გრუფი“ ასევე მოემსახურა ჭიათურისა და საჩხერის მუნიციპალიტეტებს, 2024 წლის საახალწლო ღონისძიებების გასამართად.

ფაქტობრივად ანალოგიურ მომსახურებაში, შპს „რუბიკონ გრუფს“ ჭიათურის მუნიციპალიტეტმა 205 570 ლარი გადაუხადა, ხოლო საჩხერის მუნიციპალიტეტმა – 99 999 ლარი.

დავინტერესდით, მეზობელი მუნიციპალიტეტების მიერ შპს „რუბიკონ გრუფთან“ გაფორმებული ხელშეკრულებების დანართი ანგარიშფაქტურებით.

ფასების ცხრილის შედარებით დგინდება, რომ

  • სანტას მომსახურება საჩხერეში 600 ლარი დაჯდა, ხარაგაულში – 850 ლარი;
  • ელფების მომსახურება ხარაგაულში – 1 950 ლარი, საჩხერეში – 1 200 ლარი;
  • თითო ირმის მომსახურება ხარაგაულში – 1 050 ლარი, ხოლო საჩხერეში – 700 ლარი;
  • განათება, გახმოვანება, სცენა და გადახურვა ხარაგაულში 20 000 ლარი დაგვიჯდა, საჩხერეში – 16 949 ლარი გადაიხადეს;
  • 10 ცალი გამათბობლით სარგებლობა ხარაგაულში 3 000 ლარი დაჯდა, საჩხერეში – 1 000 ლარი;

ხარაგაულში გამართული საახალწლო ღონისძიებისთვის 4 პროდაქშენ მენეჯერი აღმოჩნდა საჭირო, რაშიც 10 408 ლარი გადავიხადეთ, საჩხერეში ანალოგიური მომსახურებისთვის ორ მენეჯერზე – 5 204 ლარია გადახდილი;

საჩხერის საახალწლო ღონისძიებისთვის არ აღმოჩნდა საჭირო გრაფიკოს დიზაინერის, მხატვარ-დეკორატორისა და ფოტოგრაფის მომსახურება, – რაშიც, ჯამში, ხარაგაულში 9 107 ლარი გადავიხადეთ;

ხარაგაულში საახალწლო ღონისძიებაში ჩართული პირების სამივლინებო ხარჯებში 3 691 ლარი გადავიხადეთ, საჩხერეში – 1 691 ლარი დაჯდა;

ხარაგაულში გამართული საახალწლო ღონისძიების ტრანსპორტირების ხარჯები 13 500 ლარს შეადგენს, საჩხერეს შემთხვევაში კი – 5 367 ლარია.

რედაქციისგან – ამ ინფორმაციას გაზეთ „ჩემი ხარაგაულის“ მკითხველები 19 იანვარს გაეცვნენ.

ამ ვებგვერდზე სრული ინფორმაციის შემოთავაზებას ვაპირებდით, ხარაგაულის მუნიციპალიტეტში გამართული საახალწლო ღონისძიებების ხარჯთაღრიცხის შესახებ.

ამ საჯარო ინფორმაციის მოპოვების მიზნით ხარაგაულის მუნიციპალიტეტის მერიას 2023 წლის 20 დეკემბერს მივმართეთ.

ჩვენგან მოთხოვილი საჯარო ინფორმაცია, – ხარაგაულის მუნიციპალიტეტში დაგეგმილი საახალწლო ღონისძიებებისა და თითოეული ამ ღონისძიების ხარჯთაღრიცხვის შესახებ, – ხარაგაულის მერიას ამ დრომდე არ მოუწოდებია.