საავტომობილო გზების დეპარტამენტისგან მოლითი-ფონა-ჩუმათელეთის გზის მშენებლობისთვის გამოცხადებულ ტენდერში წინადადებების მიღება დღეს, 2 ოქტომბერს, დასრულდა.

მშენებელმა კომპანიამ New Road 96 309 131 ლარი დააფიქსირა. სწორედ ამ თანხაზეა გამოცხადებული ტენდერი.

ეს ტენდერი მოლითი-ჩუმათელეთის გზის მშენებლობისთვის გამოცხადებული, რიგით მეშვიდე, ტენდერია. წინა ორ შემთხვევაში (2023 წლის მაისის და 2023 წლის ივლისის) მონაწილეობა არც ერთმა კოპანიამ არ მიიღო; ხოლო 2022 წლის ოქტომბერში გამოცხადებული ტენდერი ჩაშლილად გამოცხადდა.

შპს New Road ის კომპანიაა, რომელიც ზესტაფონი-კიცხი-ხარაგაულის საავტომობილო გზას აგებს.

ამჟამად მოლითი-ფონა-ჩუმათელეთის გზის ტენდერში მონაწილე კომპანიის შერჩევა-შეფასების პროცესი მიმდინარეობს.

ტენდერში გამარჯვებულმა მოლითი-ჩუმათელეთის საავტომობილო გზის მშენებლობა ხელშეკრულების დადებიდან ორ წელიწადში უნდა დაამთავროს.

მოლითი-ფონა-ჩუმათელეთის საავტომობილო გზა რიკოთის ავტობანის ალტერნატიულია.

ამ გზის რეაბილიტაცია სასიცოცხლოდ მნიშვნელოვანია ჩხერიმელას ხეობის მიმდებარე სოფლების მოსახლეობისთვის.