დღეს, 27 მარტს, თეატრის საერთაშორისო დღე ხარაგაულში სპექტაკლით „მაცეკვე ტანგო“ აღინიშნა.

ეს სპექტაკლი სპეციალურად ხარაგაულელი უფროსკლასელებისთვის გაიმართა. სპექტაკლის დაწყებამდე თეატრის რეჟისორმა ირინე ჩხეიძემ მაყურებელს მიმართა.

„ხარაგაულის სახალხო თეატრს 123 წლის უწყვეტი ტრადიცია გააჩნია, – აღნიშნა ირინე ჩხეიძემ, – გასულ წელს დავით კლდიაშვილის ნაწარმოების მიხედვით დადგმული სპექტაკლი „დარისპანის გასაჭირი“ რომ ვითამაშეთ, ჩემთან რამდენიმე უფროსკლასელი მოვიდა და მითხრა, რომ თეატრში ისინი პირველად იყვნენ.

ეს ფაქტი ძალიან განვიცადე. ჩვენი თეატრი სპექტაკლებს მართავს არა მარტო ხარაგაულში, არამედ საქართველოს სხვადასხვა ქალაქებსა და უცხოეთში. ამიტომ ხარაგაულელი ახალგაზრდები უნდა იცნობდნენ ამ თეატრს.

გადავწყვიტეთ და ტრადიციად დავამკვიდრებთ, – თეატრის საერთაშორისო დღეს ყოველთვის გავმართავთ სპექტაკლს ხარაგაულის მუნიციპალიტეტში მოქმედი სკოლების უფროსკლასელებისთვის“.

„ქალბატონო ირინე, ძალიან ნასიამოვნები და ემოციურად ავსილი ვარ დღევანდელი სპექტაკლით. ძალიან მომეწონა ყველა მსახიობის მიერ შესრულებული და დახატული პერსონაჟები, მაგრამ განსაკუთრებულად უნდა აღვნიშნო „ნელის“ იდეალური შესრულება. მადლობა, რომ ასეთი სიამოვნება მოგვანიჭეთ მაყურებლება. ეჭვიც არ მეპარებოდა, რომ სპექტაკლი სრული ანშლაგით ჩაივლიდა, მაგრამ ასეც არ ველოდი. დასაჯდომი ადგილი ძლივს ვიპოვნე. კიდევ ერთხელ გილოცავთ“, – ასეთი შთაბეჭდილებით დაბრუნდა ზესტაფონში, სპეციალურად ამ სპექტაკლისთვის მოსული ხარაგაულელი ლაზარე ორჯონიკიძე.

დღესვე ხარაგაულის სახალხო თეატრის ღვაწლმოსილი მსახიობები და მხატვარი მადლობის სიგელებით დააჯილდოეს.