საქართველოსა და გერმანიის მთავრობების თანამშრომლობის ფარგლებში, ხარაგაულის მუნიციპალიტეტში „სამოქალაქო ბიუჯეტირების პროგრამა“ ხორციელდება.

ამ პროექტის ფარგლებში მერიისგან გამოცხადებულ კონკურსში 25 საპროექტო წინადადება შევიდა. სამუშაო ჯგუფმა 16 იდეა მოიწონა. მერიის ფეისბუქგვერდზე გამოქვეყნებული ამ იდეებიდან მოქალაქეთა მიერ ყველაზე მეტად მხარდაჭერილი 7 პროექტი შეირჩა.

ხარაგაულში სამოქალაქო ბიუჯეტირების პროგრამით შემდეგი პროექტების განხორციელება იგეგმება:

  1. ხარაგაულის აღმნიშვნელი დეკორატიული აბრების მოწყობა (პროექტის ავტორია გივი კურტანიძე);
  2. „ჯანსაღი ცხოვრების წესი სოფლად“ – ვერტვიჭალაში მინიმოედნის მოწყობა (პროექტის ავტორია კობა სხილაძე);
  3. „ხარაგაული ჩაიფიქრე“ – ხარაგაულის სერზე ტურისტული ლოკაციის მოწყობა (პროექტის ავტორია ზურაბ თაბუკაშვილი);
  4. „ლილეს წყაროს“ მოწყობა კიცხში (პროექტის ავტორია დეა ბერაძე);
  5. ხარაგაულში ფრენბურთის მოედნის მშენებლობა (პროექტის ავტორია დიმიტრი ჩიკვაიძე);
  6. ღორეშაში ხელოვნურსაფარიანი მინიმოედნის მოწყობა (პროექტის ავტორია ზაზა გლუნჩაძე);
  7. ფარცხნალში დევდარიანებისა და ლეჟავების უბანში წყლის ჭაბურღილის მოწყობა (პროექტის ავტორია გულნარა დევდარიანი).

როდის დაიწყება სამოქალაქო ბიუჯეტირების კონკურსში გამარჯვებული იდეების პროექტირება და განხორციელება, – ამ შეკითხვით ხარაგაულის მუნიციპალიტეტის მერს, კობა ლურსმანაშვილს მივმართეთ.

– გამარჯვებული იდეების ავტორებს პროექტირების პროცესში ჩართულობა ვთხოვეთ, – ამბობს კობა ლურსმანაშვილი, – უახლოეს დღეებში პროექტების მოსამზადებლად ტენდერს გამოვაცხადებთ. ვფიქრობთ, აპრილის შუა რიცხვებისთვის პროექტების შემსრულებლებიც გამოვლინდებიან და სამშენებლო სამუშაოები დაიწყება. პროექტების განხორციელებას დიდი დრო არ დასჭირდება. სავარაუდოდ, ექვს თვეში შვიდივე პროექტი დასრულდება“.

მოქალაქეებისგან წარმოდგენილი ინიციატივების განსახორციელებლად, ხარაგაულის მუნიციპალიტეტის 2022 წლის ბიუჯეტში 150 000 ლარი განისაზღვრა.

ნინო კაპანაძე

ამავე თემაზე

რა უფრო დიდი პრობლემაა ხარაგაულში – დეკორატიული აბრების მოწყობა თუ მიუსაფარი ძაღლები

ხარაგაულში სამოქალაქო ბიუჯეტირების პროგრამა იწყება