ხარაგაულის მუნიციპალიტეტში სამოქალაქო ბიუჯეტირების პროგრამის განხორციელება დაიწყო.

სამოქალაქო ბიუჯეტირების პროგრამა საქართველოსა და გერმანიის მთავრობების თანამშრომლობის ფარგლებში ხორციელდება. 2022 წლისთვის, სამოქალაქო ბიუჯეტი 150 000 ლარით განისაზღვრება. პროგრამის ფარგლებში მინიმუმ ხუთი საპროექტო წინადადება დაფინანსდება  და  თითოეულზე თანხის მაქსიმალური ოდენობა არაუმეტეს 30 000 ლარი იქნება.

ხარაგაულის მერიიდან მოპოვებული ინფორმაციით, ამ პროგრამის ფარგლებში მოქალაქეებიდან 25 საპროექტო წინადადება შევიდა. მერიაში ამ პროექტების შესაფასებლად მერის ბრძანებით სამუშაო ჯგუფი შეიქმნა.

ჯგუფის შემადგენლობაში არიან:

ვარლამ ჭიპაშვილი – მერის პირველი მოადგილე,
დავით დევდარიანი მერის მოადგილე და პროგრამის კოორდინატორი,
ვლადიმერ გელაშვილი საფინანსო-საბიუჯეტო სამსახურის უფროსი,
ეკა დვალიშვილი – საფინანსო-სახაზინო განყოფილების უფროსის მოვალეობის შემსრულებელი,
პეტრე შარიქაძე – ინფრასტრუქტურისა და კეთილმოწყობის სამსახურის უფროსის მოვალეობის შემსრულებელი,
ინგა ლურსმანაშვილი – იურიდიულოი განყოფილების უფროსი
ირინე ჩხეიძე – განათლების, კულტურის, სპორტისა და ახლგაზრდულ საქმეთა სამსახურის უფროსი.

სამუშაო ჯგუფი გადაწყვეტილების მისაღებად 15 სექტემბერს შეიკრიბა. ამ სხდომას მერის მოადგილე ვარლამ ჭიპაშვილი შვებულებაში ყოფნის გამო ვერ ესწრებოდა. სხდომაზე ვერ გამოცხადდა ინგა ლურსმანაშვილი.

სამუშაო ჯგუფმა პროგრამის დასკვნითი ეტაპისთვის 16 პროექტი შეარჩია:

  1. ჯანსაღი ცხოვრების წესი სოფლად – სოფ. ვერტყვიჭალა;
  2. ნაგავს ნუ დაყრი – სოფ. ვერტყვიჭალა;
  3. მზის ელექტროსადგური – დაბა ხარაგაული;
  4. ხარაგაულის აღმნიშვნელი დეკორატიული აბრების მოწყობა – დაბა ხარაგაული;
  5. ხელოვნურ საფარიანი მინი მოედანი – სოფ. ღორეშა;
  6. ხელოვნურ საფარიანი სპორტული მოედანი – საქარიქედი;
  7. სოციალური სამრეცხაო – დაბა ხარაგაული;
  8. უწყლობის პრობლემის გადაჭრა – ლაშის იგორეთი;
  9. მეტი სიცოცხლე სოფელს – სოფ. გედსამანია;
  10. გადახურული ტრენაჟორები – დაბა ხარაგაული (რიყის ბინების მიმდებარე ტერიტორია);
  11. ხარაგაული ჩაიფიქრე – დაბა ხარაგაული;
  12. წყლის ჭაბურღილი – სოფ. ფარცხნალი;
  13. ფრენბურთის მოედანი – დაბა ხარაგაული;
  14. ლილეს წყარო – სოფ. კიცხი;
  15. ჩვენი მშვენიერი გარემო – სოფ. ბორითი;
  16. ქუჩის ტრენაჟორები – დაბა ხარაგაული.

ეს პროექტები კენჭისყრაში ჩაერთვება. ამისთვის კითხვარი ხარაგაულის მერიის ოფიციალურ ფეისბუქგვერდზე გამოქვეყნდა. ხარაგაულელებს საშუალება აქვთ, პროექტების ჩამონათვალიდან მათთვის სასურველი წინადადება აირჩიონ და მხარი დაუჭირონ.

ის იდეა, რომელიც მოსახლეობის ყველაზე მეტ მხარდაჭერას მოიპოვებს, ხარაგაულის 2022 წლის ბიუჯეტიდან დაფინანსდება.

ამავე თემაზე

ხარაგაულში სამოქალაქო ბიუჯეტირების პროგრამა იწყება