სოციალური მომსახურების სააგენტოში დასაქმებულთა გაფიცვა ჯანდაცვის სამინისტროსთან მოლაპარაკებით დასრულდა.

დასაქმებულთა უფლებების დამცველი ორგანიზაციის „სოლიდარობის ქსელის“ იურისტის, დავით ომსარაშვილისგან მოპოვებული ინფორმაციით, ეს არის მხოლოდ პირველი წინგადადგმული ნაბიჯი.

ჩვენ დავასრულეთ გაფიცვა შემდეგი პირობებით:

  • მივაღწიეთ ხელფასების 40%-60%-ით მატებას, 15 წელზე მეტია, სააგენტოში ხელფასები არ გაზრდილა;
  • დეკრეტული შვებულება ანაზღაურდება სრულად, რაც ნიშნავს, რომ ბავშვის გაჩენის შემდეგ ყოველ თვე, დეკრეტული შვებულების დასრულებამდე, მშობელი მიიღებს იგივე ანაზღაურებას, როგორც ხელფასს მუშაობისას;
  • გაფიცულებს აუნაზღაურდებათ გაფიცული სამუშაო დრო;
  • სოცაგენტები და უფროსი სოცაგენტები იქნებიან უზრუნველყოფილი ტრანსპორტით;
  • გაუქმდება ერთთვიანი ხელშეკრულებები და ყველა დასაქმებულთან დაიდება ერთწლიანი ხელშეკრულებები;
  • შეიქმნება სპეციალური საკომუნიკაციო პლატფორმა დასაქმებულსა და დამსაქმებელს შორის;
  • უმჯობესდება სადღესასწაულო დღეებში დანამატის გაცემის წესი.

დღეიდან, 24 იანვრიდან, სოციალური მომსახურების სააგენტოს რაიონული განყოფილებები ყველა მუნიციპალიტეტში მუშაობას ჩვეულ რეჟიმში აგრძელებენ.

სოციალური მომსახურების სააგენტოს თანამშრომლები 17 იანვარს გაიფიცნენ. მათ აქციები ჯანდაცვის სამინისტროსთან და მთავრობის კანცელარიასთან გამართეს.

ფოტოზე: აქცია მთავრობის კანცელარიასთან, 20 იანვარი