მეოთხე დღეა, მთელი ქვეყნის მასშტაბით, სოციალური მომსახურების სააგენტოების საქმიანობა პარალიზებულია.

ამის მიზეზი ამ სააგენტოების თანამშრომელთა გაფიცვაა.

გაფიცული თანამშრომლები დღეს, 20 იანვარს, მთავრობის კანცელარიასთან შეიკრიბნენ და პრემიერ-მინისტრ ირაკლი ღარიბაშვილთან შეხვედრას მოითხოვენ.

მთავრობის კანცელარიასთან დღეს შეკრებილებს სოციალური მომსახურების სააგენტოს ხარაგაულის განყოფილების თანამშრომლები შეუერთდნენ.

სოცაგენტის, ქეთევან ბოლქვაძისგან მოპოვებული ინფორმაციით, მათი უფლებების დამცველი ორგანიზაცია „სოლიდარობის ქსელის“ წარმომადგენლებმა პრემიერ-მინისტრთან შეხვედრა ოფიციალური წერილით მოითხოვეს.

სოციალური მომსახურების სააგენტოს გაფიცული თანამშრომლები ახლა პასუხს მთავრობის მეთაურისგან ელოდებიან.

შეგახსენებთ, რომ ისინი ხელფასის 100%-ით გაზრდას, სამედიცინო დაზღვევას, სამსახურებრივი მოვალეობის შესასრულებლად გაწეული ტრანსპორტირების ხარჯის ანაზღაურებას, კოლექტიური ხელშეკრულების გაფორმებას, ანაზღაურებად დეკრეტულ შვებულებას მოითხოვენ.

ამავე თემაზე 

ჯანდაცვის სამინისტროსგან სიტყვიერ დაპირებას აღარ ვენდობით – ამბობენ გაფიცული სოცაგენტები