ხარაგაულის მუნიციპალიტეტის გამგეობიდან მოპოვებული ინფორმაციით, ხარაგაულის მუნიციპალიტეტის 2015 წლის ადგილობრივ ბიუჯეტში, საბიუჯეტო დეფიციტის მართვის მიზნით, შემცირდა ტრანსპორტის ექსპლუატაციისა და მოვლა-შენახვის ხარჯი 117,6 ათასი ლარიდან 90,6 ათას ლარამდე;

წარმომადგენლობითი ხარჯი შემცირდა 18 ათასი ლარიდან 12 ათას ლარამდე;

არასაცხოვრებელი შენობების რემონტი შემცირდა 49,8 ათასი ლარიდან 10 ათას ლარამდე.

სულ ხარაგაულის მუნიციპალიტეტის 2015 წლის ბიუჯეტში ხარჯები შემცირდა 72,8 ათასი ლარით.

საბიუჯეტო დეფიციტის მართვის მიზნით გასატარებელი ღონისძიებები პრემიერ-მინისტრ ირაკლი ღარიბაშვილის 6 მარტის #422 განკარგულებით განისაზღვრა.

ამ განკარგულების თანახმად, ადგილობრივ თვითმმართველობებს ეთხოვათ, რომ შრომის ანაზღაურების მუხლით 2015 წელს გაწეული ხარჯი თითოეული საბიუჯეტო ორგანიზაციისთვის არ უნდა აღემატებოდეს 2014 წლის საკასო ხარჯს.

პრემიერ-მინისტრის განკარგულებით ადგილობრივ თვითმმართველობებს ასევე ეთხოვათ ადმინისტრაციული ხარჯების შეზღუდვის პრინციპები გაითვალისწინონ 2016-2017 წლების ბიუჯეტების დაგეგმვისას.

პრემიერ-მინისტრის 6 მარტის #422 განკარგულების თანახმად, მაქსიმალურად უნდა შეიზღუდოს მივლინების ხარჯების დაფინანსება და ოფისის მოვლა-შენახვასთან დაკავშირებული ხარჯები;

მოხმარებული საწვავის ხარჯები 2014 წლის საკასო ხარჯთან შედარებით წელს არანაკლებ 30%-ით უნდა შემცირდეს;

უნდა შეიზღუდოს წარმომადგენლობითი ხარჯების დაფინანსება, რბილი ინვენტარის, უნიფორმების, პირად ჰიგიენასთან დაკავშირებული, საოფისე ტექნიკისა და სატრანსპორტო საშუალებების შეძენა.

პრემიერ-მინისტრის განკარგულების თანახმად, ადგილობრივ თვითმმართველობებს ადმინისტრაციული ხარჯების შემცირებასთან დაკავშირებით ინფორმაცია ფინანსთა სამინისტროსთვის 23 მარტისთვის უნდა წარედგინათ.