საკვები პროდუქტების მომზადებისას სანიტარიულ-ჰიგიენური სტანდარტების დაცვა გამკაცრდა.

ამ მიმართულებით კონტროლის გაძლიერებას HACCP (ჰასპი) ითვალისწინებს. ჰასპის მეთოდით თავად მწარმოებელმა უნდა დაადგინოს, თუ სად შეიძლება წარმოიშვას საკვების დაბინძურების საფრთხე და ასეთი კრიტიკული წერტილები წინასწარ გამოავლინოს.

ჰასპის დანერგვა კვების იბიექტებში პირველი ივნისიდან სავალდებულოა. სასწავლო წლის დაწყებიდან კი – საბავშვო ბაღებში.

ხარაგაულის სკოლამდელ დაწესებულებათა გაერთიანების (დირექტორი მამუკა ჭიპაშვილი) თანამშრომლებისთვის სურსათის უვნებლობის ამ ახალი სტანდარტის შესახებ ტრენინგი ჩატარდა.

სურსათის უვნებლობის სპეციალისტმა ნანა კიკნაძემ ისაუბრა იმაზე, თუ რა წესები უნდა დაიცვან საბავშვო ბაღებში საკვების მიღება-ჩაბარების, შენახვისა და მომზადებისას.

„პროდუქციის მწარმოებლის ვალდებულებაა, რომ ჯანსაღი პროდუქცია მოგაწოდოთ, – აღნიშნა ნანა კიკნაძემ, – თქვენ უნდა მოითხოვოთ მისი წარმოშობისა და ვარგისიანობის დამადასტურებელი დოკუმენტები.

საკვები პროდუქტების საბავშვო ბაღებში მიღებისას ასევე უნდა შემოწმდეს იმ ტრასნპორტის სანიტარული მდგომარეობა, რომლითაც პროდუქცია მოიტანეს.

საკვების დამუშავებისა და მომზადებისას წინასწარ უნდა შემოწმდეს იმ პირის ჯანმრთელობის მდგომარეობა, ვინც საჭმელს ამზადებს. მნიშვნელოვანია, პირადი ჰიგიენა. ექთანმა უნდა შეამოწმოს მზარეულისა და მისი დამხმარეს კანი, ფრჩხილები, მაკიაჟი, ხომ არ აქვს საჭმლის მომზადებელ პირს სურდო ან დიარეა.

საკვები პროდუქტების დამუშავება ცალკე ციკლია. სხვადასხვა პროდუქტისთვის სხვადასხვა დასაჭრელი დაფები და დანები უნდა გამოიყენოთ. ხორცის ტემპერატურა მომზადების წინ სპეციალური თერმომეტრით უნდა გაიზომოს. ის +4 გრადუსს არ უნდა აღემატებოდეს. მომზადებული სადილის ტემპერატურა კი არ უნდა იყოს + 70 გრადუსზე დაბალი.

რაც მთავარია, საკვების მიღების მომენტიდან მისი საბოლოო სახის მიცემამდე თითოეული ნაბიჯი სპეციალურ ჟურნალებში მკაცრად უნდა აღირიცხოს. ჟურნალები ექთნისგან და მენეჯერისგან გაკონტროლდება“.

საბავშვო ბაღებში საკვების დაბინძურების ყველაზე მეტი რისკი არსებობს:

  • საკვების გალღობის;
  • მისი თერმული დამუშავების;
  • სადილის გაგრილების;
  • ფქვილის გაცრის დროს.

ნანა კიკნაძემ ხარაგაულის სკოლამდელ დაწესებულებათა გაერთიანების თანამშრომლებთან შეხვედრისას აღნიშნა, რომ სწავლის დაწყების შემდეგ საბავშვო ბაღებში საჭმლის მომზადების პროცესს ადგილზე გაეცნობა.

რამდენად იცავენ საკვების მწარმოებლები HACCP-ის პრინციპებს, ამას სურსათის ეროვნული სააგენტო გააკონტროლებს.

და მაინც, რა არის ჰასპი

„ჰასპის“ დანერგვა შვიდი ლოგიკური ნაბიჯისგან შედგება:

  • პროდუქტისა და მისი მომზადების ტექნოლოგიის შესწავლა, რათა გამოვლინდეს ყველა შესაძლო საფრთხე (დეფექტი), რაც ამ პროდუქტს შეიძლება სჭირდეს;
  • პროდუქციის წარმოებისას იმ სტადიების გამოვლენა, როცა ეს დეფექტი შეიძლება წარმოიშვას – ე.წ. კრიტიკული სტადიების/წერტილების დადგენა;
  • ყოველი „კრიტიკული წერტილისთვის“ რაიმე ისეთი პარამეტრის შერჩევა, რომლის საშუალებით შესაძლებელია გაკეთდეს დასკვნა, დაირღვა სურსათის უვნებლობა თუ არა. მაგალითად, ვიზუალური დათვალიერება, ტემპერატურის გაზომვა, სწრაფი მიკრობიოლოგიური ან ფიზიკო-ქიმიური ტესტი, ან თუნდაც სამაცივრო კამერის კარის ღიაობის ხანგრძლივობა;
  • ყოველ კრიტიკულ წერტილში უნდა აეწყოს წუნის კონტროლის სისტემა – ანუ ოპერატორი ან დანადგარი, რომელიც რეგულარულად ამოწმებს კრიტიკულ პარამეტრს და თუკი იგი დადგენილ ზღვარს აჭარბებს – დაიწუნებს პარტიას;
  • იმ ღონისძიების დადგენა, რომელიც ხორციელდება დაწუნებული პარტიის მიმართ – ეს შეიძლება იყოს მთელი პარტიის ხელახლა მოხარშვა, ან სხვაგვარი გადამუშავება, ან განადგურება ან სხვ.;
  • მეტი საიმედოობისთვის უნდა დაწესდეს ორმაგი დაცვა – შემმოწმებელთა კონტროლი, რომლითაც მოწმდება, თუ რამდენად გულდასმით და უწყვეტად მუშაობს წუნის კონტროლის სისტემა ყოველ კრიტიკულ წერტილზე;
  • უფრო მეტი საიმედოობისთვის და შესაძლო პრეტენზიების განსახილველად, ან თუნდაც ბაზარზე მავნე სურსათის მოხვედრის ყველა ფაქტის გამოსაძიებლად აუცილებელია, ყველა ეტაპის დოკუმენტირება-აღრიცხვა – ვინ და როდის შეამოწმა, რა პარამეტრი, რა ზომები განახორციელა. უნდა იწარმოებოდეს აღრიცხვის ჟურნალები, სადაც ეს ყველაფერი იწერება.

ნინო კაპანაძე

ტრენინგის ამსახველი ფოტოები იხილეთ სოციალურ ქსელში

ამავე თემაზე ასევე დაგაინტერესებთ

„ჰასპის წესების დარღვევისთვის მეწარმე გაუფრთხილებლად დაჯარიმდება“