ხარაგაულის მუნიციპალიტეტის საკრებულოს ფრაქციის – „ქართული ოცნება – დემოკრატიული საქართველო“ – თავმჯდომარე ვარლამ თავზარაშვილმა 5 იანვარს გამართულ საკრებულოს სხდომაზე კოლეგებს მიმართა. „ძალიან ცუდ მდგომარეობაში ვარ და დეპუტატებს მინდა ვკითხო რჩევა, როგორ მოვიქცე. თექვსმეტკაციანია ჩემი ფრაქცია და იმის მიუხედავად, რომ კატეგორული მოთხოვნა დავაყენე იმ ადამიანის წინაშე, ვინც უნდა მოაგვაროს ჩემი პრობლემა, საკითხი დღემდე მოუგვარებელია. მაქვს უამრავი საქმე და სამუშაო. სხვებისგან განსხვავებით, არ ვეძებ გაბრაზებულ და განაწყენებულ ადამიანებს, ვეძებ გაჭირვებულ ადამიანებს, რომ მას დახმარება გავუწიო და ვიმუშაო. არ მაქვს სამუშაო პირობები, არ მაქვს ოთახი,“ – აღნიშნა დეპუტატმა.

მან საკრებულოს თავმჯდომარეს მიმართა, რომ დღეიდან ის მის ოთახში დაიკავებს ადგილს და სხდომების ჩატარების დროს დიდი სიამოვნებით დაუთმობს.

„თქვენ რომ ყოფილიყავით ოთახის გარეშე, ხომ სასწრაფოდ მოაგვარებდით ამ საკითხს. ხომ გარემონტდა სასწრაფოდ მაჟორიტარი დეპუტატის ოთახები, არანაკლებად არჩეული ვარ მეც და მჭირდება სამუშაო პირობები. მაჟორიტარ დეპუტატს ქუთაისშიც აქვს და აქაც ოთახები და მე ერთი ოთახი არ მეკუთვნის?“ – განაცხადა ვარლამ თავზარაშვილმა.

საკრებულოს წევრმა „არასაპარლამენტო ოპოზიციიდან,“ რომან შერგელაშვილმა ვარლამ თავზარაშვილს მიმართა – „კოდექსით პირდაპირ არის გაწერილი, როგორ უნდა მოიქცეთ ამ შემთხვევაში.“

დეპუტატ ვარლამ ჭიპაშვილის თქმით, ფრაქცია „ნაციონალური მოძრაობის“ ოთახი დიდი ხანია დაკეტილია და ფრაქციას „ქართული ოცნება – დემოკრატიული საქართველო“ შეუძლია მისი გამოყენება. „კენჭისყრაში არ მონაწილეობენ, კომისიის სხდომაზე არ დადიან. ოპოზიციას რომ ვუსვამთ თავზე ხელს, დემოკრატიულად ვიცხოვროთ, კი ბატონო, მაგრამ ყველას გვინდა თანაბარი პირობები,“ – აღნიშნა ვარლამ ჭიპაშვილმა.

საკრებულოს თავმჯდომარე ინგა მაღრაძის თქმით, საკრებულოს ნამდვილად ესაჭიროება დამატებითი ფართი. მან მუნიციპალიტეტის გამგებელს მიმართა, რომ გამოათავისუფლოს მესამე სართულზე ის ორი ოთახი, სადაც გამგეობის სამსახურია განთავსებული.

ნინო კაპანაძე