ხარაგაულის სკოლამდელ დაწესებულებათა გაერთიანების დირექტორის, მამუკა ჭიპაშვილისგან მოპოვებული ინფორმაციით, პირველი მარტიდან საქმიანობას ხარაგაულის #1 და #2 საბავშვო ბაღები შეუდგებიან.

4 მარტიდან სასწავლო-სააღმზრდელო პროცესი, ვერტყვიჭალისა და საღანძილის საბავშვო ბაღების გარდა, ყველგან განახლდება. ამ ორ საბავშვო ბაღში აღსაზრდელთა მიღებას, სავარაუდოდ, 9 მარტიდან შეძლებენ.

„მოგეხსენებათ, კორონავირუსზე ტესტირება საბავშვო ბაღის ყველა თანამშრომელმა უნდა ჩაიტაროს, – ამბობს მამუკა ჭიპაშვილი, – რაც სოფლებში, 18 საბავშვო ბაღში, პირველ მარტამდე ვერ მოესწრება.

რაც შეეხება ვერტყვიჭალასა და საღანძილეს, ახალაშენებული შენობები მუნიციპალური განვითარების ფონდიდან ადგილობრივ თვითმმართველობას ჯერ არ ჩაუბარებია. უახლოეს დღეებში ეს პროცესი დასრულდება და ამ ორ საბავშვო ბაღში სწავლა, სავარაუდოდ, 9 მარტიდან განახლდება“.

საკოორდინაციო საბჭოს გადაწყვეტილებით, საბავშვო ბაღები საქმიანობას პირველი მარტიდან შეუდგებიან.