5 ნოემბრიდან 19 ნოემბრამდე საქართველოში მოსახლეობის საყოველთაო აღწერა ტარდება.  აღწერის მიზანია მოსახლეობის შესახებ ზუსტი მონაცემების მიღება და დემოგრაფიული ვითარების დადგენა სოციალურ-ეკონომიკური განვითარების პრიორიტეტების განსაზღვრისა და საზოგადოების ინფორმირების მიზნით.

ხარაგაულში აღმწერების მუნიციპალური ზედამხედველის ნიკოლოზ ფცქიალაძის ინფორმაციით, ხარაგაულში აღწერებისთვის აყვანილია 58 აღმწერი, 11 ინსტრუქტორ-კონტროლიორი და ორი სექტორის ხელმძღვანელი. აღმწერები შეავსებენ სპეციალურ ფორმებს, – გვიამბობს ნიკოლოზ ფცქიალაძე, – არსებობს ოთხი სახის ფორმა. ფორმა #1 ივსება საცხოვრისზე, სადაც აღიწერება სახლის კეთილმოწყობა. ინსტრუქციაში მოცემულია, თუ როგორ უნდა განისაზღვროს სახლის კეთილმოწყობა. ფორმა #2 ოჯახის ყველა წევრზე ცალცალკე შეივსება. ფორმა #3 განკუთვნილია ემიგრანტებისთვის, რომლებიც ოჯახები 2002 წლიდან დატოვეს. ფორმა #4 ითვალისწინებს სოფლის მეურნეობის აღწერას.“

ნიკოლოზ ფცქიალაძის თქმით, შევსებულ ფორმებს 19 ნოემბრის შემდეგ შეაჯამებენ ინსტრუქტორ-კონტროლიორები, შემდეგ – სექტორების ხელმძღვანელები. ამავე დროს გადამოწმდება ყოველი მეათე ოჯახი.

ყველა მოქალაქე ვალდებულია, რომ აღმწერს მიაწოდოს ზუსტი ინფორმაცია. მოსახლეობის საყოველთაო აღწერა ყოველ ათ წელიწადში ერთხელ ტარდება.

ფოტოზე: აღმწერი ეთერი მაჩიტაძე ენვერი ხიჯაკაძის ოჯახში აღწერაზე