დღეს ხარაგაულში ფაროსანას წინააღმდეგ თერმული ნისლის გაშვება დაგეგმილია

  • ლეღვნის თემის სოფლებში – ლეღვანში, მარელისში, დიდვაკესა და  პატარა სახვლარში;
  • საღანძილის თემის სოფლებში – საღანძილეში, ვანში, ზარანში, სხლითში, ჩხერში, ჯაფაროულში;
  • წყალაფორეთის თემში – ლახუნდარაში, პატარა ვარძიაში, ჩალხაეთსა და ხონში;
  • ღორეშაში.

აღნიშნულ სოფლებში თერმული ნისლი 10 აგვისტოს უნდა გაეშვათ, თუმცა ამას ხელი წვიმამ შეუშალა.

შეწამვლითი სამუშაოები საღამოს 09:00 სთ-დან 10:00 სთ-მდე პერიოდში დაიწყება.

სურსათის ეროვნული სააგენტოს იმერეთის რეგიონული სამმართველოს უფროსი ინსპექტორის, ნინო სახვაძის ინფორმაციით, თერმული ნისლი იმ ჯგუფის პრეპარატია, რომელიც სასოფლო-სამეურნეო მცენარეების შეწამვლისას გამოიყენება და ადამიანებისთვის საფრთხეს არ წარმოადგენს.

თუმცა, უსაფრთხოების ნორმების დაცვა აუცილებელია. თერმული ნისლის გაშვების მომენტში უმჯობესია მოსახლეობამ დახუროს კარ-ფანჯარა, ხოლო  20-30 წუთის შემდეგ ადამიანებს ჩვეულებრივ შეუძლიათ საქმიანობის გაგრძელება.

ნინო სახვაძის განმარტებით, შეწამვლა ფუტკრისთვის საფრთხის შემცველი არ იქნება. იმ მოსახლეებთან, რომელთაც საფუტკრე მეურნეობა აქვთ, თერმული ნისლის აგრეგატს გამორთავენ.

შეწამვლითი სამუშაოებისას ლეღვანის თემის სოფლებში ორი, საღანძილის თემის სოფლებში ოთხი, ღორეშის თემის სოფლებში სამი, წყალაფორეთის თემის სოფლებში ხუთი მანქანა იმუშავებს.

ნინო სახვაძის ინფორმაციით, შეწამვლითი სამუშაოები ოქტომბრამდე გაგრძელდება.

თუ როდის და სად ჩატარდება ფაროსანას წინააღმდეგ სამომავლოდ თერმული ნისლის გაშვება, დაინტერესებულ პირებს ინფორმაციის მიღება farosana.ge-ზე 24 საათით ადრე შეუძლიათ.