რიკოთის ავტომაგისტრალის მიმდებარე რესტორნებში, ძირითადად, ადგილობრივი მოსახლეობა იყო დასაქმებული. კორონავირუსის პანდემიის გამო, თვეზე მეტია, რესტორნების დაკეტილ შენობებს დარაჯები იცავენ.

შპს „საგანძურის“ დირექტორი, რესტორან „მარანის“ მფლობელი თამარ კურტანიძე ამბობს, რომ რესტორნის დაკეტვამდე ყველა საგადასახადო ვალდებულება გაისტუმრა და თანამშრომელთა ხელფასები დაფარა.

„თანამშრომლებზე, რომელთა შემოსავლის ერთადერთი წყარო რესტორანში მუშაობით აღებული ხელფასი იყო, დავეხმარეთ, – ამბობს თამარ კურტანიძე, – ექვს თანამშრომელს საკვები პროდუქტები ოჯახებში მივუტანეთ, ორს – ფულადი დახმარება აღმოვუჩინეთ. თავს ვალდებულად ვთვლი, რომ იმ ოჯახებს გვერდით დავუდგეთ და ეს რთული პერიოდი როგორმე ერთად გამოვიტანოთ.

საბანკო სესხის გადახდის სამთვიანი შეღავათით ვსარგებლობთ. დარწმუნებული ვარ, მალე ყველაფერი კარგად იქნება და კორონავირუსს დავმარცხებთ. საზოგადოებას რჩევები დროულად რომ გაეთვალისწინებია, უფრო ნაკლები დაინფიცირებული გვეყოლებოდა და ეკონომიკის ამუშავებაც მალე დაიწყებოდა.

ვფიქრობთ, მთავრობის ანტიკრიზისული გეგმიდან შეგვეხება გარკვეული შეღავათები ოფიციალურად დაქირავებული პირების საშემოსავლო გადასახადისგან გათავისუფლების თაობაზე“.

საქართველოს პრემიერ-მინისტრის, გიორგი გახარიას განცხადებით, შეზღუდვები, სავარაუდოდ, ორკვირიანი ინტერვალებით მოიხსნება.

ივნისში ღია კაფეებისა და რესტორნების გახსნა, ხოლო ივლისის დასაწყისში ყველა ყველა დახურული რესტორანისა და კვების ობიექტის ამოქმედდება იგეგმება.

ნინო კაპანაძე