კორონავირუსის გავრცელების შეჩერების გამო დაწესებული შეზღუდვები, ორკვირიანი ინტერვალებით მოიხსნება.

ამის შესახებ საქართველოს პრემიერ-მინისტრმა გიორგი გახარიამ ანტიკრიზისული გეგმის წარდგენისას განაცხადა.

მისი ინფორმაციით, ყველაფერი მაინც ეპიდემიოლოგიურ მდგომარეობაზე იქნება დამოკიდებული.

შეზღუდვების შემსუბუქება 27 აპრილიდან დაიწყება.

  • ორშაბათიდან დაშვებული იქნება ავტომანქანებით გადაადგილება, ონლაინ ვაჭრობა, ღია ტიპის აგრარული ბაზრების საქმიანობა;
  • მეორე ეტაპზე დაშვებული იქნება მშენებლობა, მშენებლობის ზედამხედველობასთან დაკავშირებული საქმიანობა, სამშენებლო მასალების წარმოება, ავტოსამრეცხაოები და ავტოსერვისების სრულად ამუშავება, კომპიუტერების და პირადი საყოფაცხოვრებო საქონლის რემონტი და სარეკრეაციო ზონების ფუნქციონირება;
  • მესამე ეტაპზე გაიხსნება ის საცალო და საბითუმო მაღაზიები, რომლებსაც გააჩნიათ დამოუკიდებელი შესასვლელი ქუჩიდან. ასევე ყველა ტიპის ღია ბაზრობა, წარმოება და საგამომცემლო საქმიანობა;
  • მეოთხე ეტაპზე გაიხსნება სავაჭრო მოლები, ღია ტიპის რესტორნები და კვების ობიექტები ადგილზე მომსახურებით. დაიშვება ყველა ტიპის საფინანსო მომსახურეობა, გაიხსნება სილამაზის სალონები და ესთეტიკური მედიცინის ცენტრები;
  • მეხუთე ეტაპზე ამოქმედდება დახურული ტიპის ბაზრები და ბაზრობები, ყველა ტიპის რესტორანი, კვების ობიექტები ადგილზე მომსახურებით.
  • მეექვსე ეტაპზე დაიშვება გასართობი, სპორტული, შემოქმედებითი საქმიანობა, აზარტული თამაშების, სასტუმროების, საგანმანათლებლო დაწესებულებებისა და ყველა სხვა სახის საქმიანობა.

კორონავირუსის პანდემიის გამო საქართველოში საგანგებო მდგომარეობა 22 მაისამდეა გამოცხადებული.