ჭიათურის მუნიციპალიტეტის სოფელ ითხვისის მოსახლეობა შეშფოთებულია, რადგან მათ თანასოფლელ ახალგაზრდა მამაკაცს კორონავირუსი დაუდასტურდა.

ეს ჭიათურაში ვირუსით დაინფიცირების პირველი შემთხვევაა.  ითხვისის საექიმო ამბულატორიის ექიმის, მაია გეგეშიძის ინფორმაციით, ამჟამად სოფელში ეპიდემიოლოგები მუშაობენ და ინფიცირებულის კონტაქტებს ადგენენ.

მაია გეგეშიძე ამბობს, რომ ინფიცირებული ახალგაზრდა მამაკაცის დედას, რომელიც ამჟამად საჩხერის საავადმყოფოში მაღალი ტემპერატურითაა მოთავსებული, აქვს დიაბეტი და გულსისხლძარღვთა დაავადებები. მისი ანალიზის პასუხი ამ ეტაპზე უცნობია. თვითიზოლაციაშია ინფიცირებულის მამა, და და დისშვილი.

ითხვისში მცხოვრები მარიამ გრძელიშვილი ამბობს, რომ მოსახლეობა პანიკაშია. მისგან მოპოვებული ინფორმაციით, ახალგაზრდა მამაკაცი სოფელში დის ქმართან ერთად ავტომანქანით 6 აპრილს ჩავიდა. მეორე დილით ის მეზობლის დაკრძალვაზე მივიდა და შემდეგ მალევე თბილისში გაემგზავრა.

„რომ გვეუბნებიან, – დარჩით სახლში, – დავრჩეთ სახლში! ნუთუ ეს ასე ძნელია, – ამბობს მარიამ გრძელიშვილი, მე პირადად არ წავედი იმ მეზობლის დაკრძალვაზე. ახალგაზრდა მამაკაცი ვირუსს ადვილად გადაიტანს, მაგრამ როგორ იქნება მისი მოხუცი დედა, ან ის ადამიანები, ვისთანაც მას ურთიერთობა ჰქონდა იმ დრომდე, სანამ ვირუსის სიმპტომები გამოუვლინდა?! მოსახლეობა ღელავს. რთულია, ახლა მშვიდად იყო“.

ფოტოზე: სოფელი ითხვისი