„შემოდგომის პალიტრა“  – ასე ეწოდება ხატვის კონკურსს, რომელიც ხარაგაულში სპორტისა და შიდა ტურიზმის ცენტრის (დირექტორი გრიგოლ ჭიპაშვილი) ორგანიზებით გაიმართა.

კონკურსში ხარაგაულის მუნიციპალიტეტში მოქმედი 26 სკოლიდან 9 სკოლის 32 მოსწავლე მონაწილეობდა. ჟიურიმ კონკურსანტებს ნატურმორტის შექმნა განუსაზღვრა.

ჟიურის წევრების – ჟუჟუნა კალანდაძის, ზეინაბ ბუაჩიძეის, გაიოზ შუბითიძისა და გია მეიფარიანის გადაწყვეტილებით, ნახატები სამი კატეგორიის მიხედვით შეფასდა – მარტივი, საშუალო და რთული.

მარტივი კატეგორის ნომინაციაში პირველი ადგილი კიცხის სკოლის მეხუთეკლასელმა რუსუდან ფანჩვიძემ დაიკავა, მეორე ადგილი – სასულიერო გიმნაზიის მეხუთეკლასელმა მარიამ ნიქაბაძემ, მესამე ადგილი – მოლითის სკოლის მეექვსეკლასელმა ლიზი კვინიკაძემ;

საშუალო სირთულის ნამუშევრებში პირველ ადგილზე გავიდა ნანა მდინარაძე (კიცხი, XI  კლ),
მეორე ადგილზე – ლუკა ყრუაშვილი (სასულიერო გიმნაზია XI კლ),
მესამე ადგილზე – თამარ შათირიშვილი (ლეღვანი, XI კლ);

რთული ნატურმორტის ნომინაციაში პირველი ადგილი ჟიურიმ სასულიერო გიმნაზიის მერვეკლასელ თეონა ჭიპაშვილს მიაკუთვნა, მეორე ადგილი – სასულიერო გიმნაზიის მერვეკლასელ მარიამ მდივნიშვილს, ხოლო მესამე ადგილი – მარელისის სკოლის მეცხრეკლასელ ნინო არევაძეს.

ჟიურის სიმპატიის პრიზი მარიამ ტაბატაძემ (მარელისი) და ეკატერინე ბუაჩიძემ (ნადაბური) დაიმსახურეს.

„ასეთი კონკურსები მოსწავლეებისთვის დიდი სტიმულია, – აღნიშნა დაჯილდოების ღონისძიებაზე ჟიურის წევრმა ზეინაბ ბუაჩიძემ, – ახალგაზრდებს საკუთარი ნიჭის წარმოჩენის შესაძლებლობა ეძლევათ. კონკურსი ასევე მნიშვნელოვანია ხატვის მასწავლებლებისთვის, – თუ როგორ უნდა ასწავლონ მოსწავლეებს ნახატის აგება, შუქ-ჩრდილები და სხვ. დარწმუნებული ვარ, მომავალ კონკურსებზე უკეთესი ნამუშევრები შეიქმნება.“

ხარაგაულის სპორტისა და შიდა ტურიზმის ცენტრი ხატვის კონკურსს 2014 წლიდან ატარებს.