ღმერთთან ლაპარაკი მოდაშია,
ეშმას დაუკრიფეს გვირილები,
სადღაც პატიება გადააგდეს,
მე კი უმიზეზოდ ვიღიმები.

ქვეყნად დაივიწყეს გაზაფხული,
აღარ გვიხატავენ შემოდგომას,
ვდგავარ ცის კიდესთან დაზაფრული,
უფრო მაღალზე მსურს შემოდგომა.

ეშმაკს მიუტანეს სულ-სხეული,
ყიდვას ვინღა ჩივის, მიაჩუქეს,
ხედავთ? – გაეყინათ სულ სხეული
ისევ სიცივისკენ მიაშურეს.

ყველა თუ მიდიხართ, მეც მანდ დამატიეთ,
ისევ უმიზეზოდ ვიღიმები,
ღმერთო მაპატიე, ღმერთო აპატიე,
ღმერთო, გვაპატიე გვირილები….

გიორგი გოგოლაძე
2018 წ.