7 ივნისიდან დაბა ხარაგაულში მოსახლეობას სასმელი წყალი არ მიეწოდება. გაერთიანებული წყალმომარაგების კომპანიის ხარაგაულის სერვისცენტრის მენეჯერის, ტარიელ ავალიშვილის ინფორმაციით, ამ წუთებში დაბა ხარაგაულში ორი წყალმზიდით სკოლების, ბაღებისა და მოსახლეობის წყლით მომარაგება დაიწყეს.

მიმდინარეობს ინტენსიური სამუშაოები, რომ დაბა ხარაგაულს წყალი პატარა ხარაგაულში არსებული წყალსადენიდან მიეწოდოს. ეს სამუშაოები, სავარაუოდ, ერთ კვირაში დასრულდება და მოსახლეობას წყალს გრაფიკით მიაწვდიან.

რაც შეეხება თავად ლეღვნის წყალსადენიდან მომავალი წყლის სისტემის აღდგენას, სამუშაოები უახლოეს ხანში დაიწყება. ტარიელ ავალიშვილის ინფორმაციით, ჯერ პროექტი უნდა შედგეს. ლეღვნის წყალსადენის სისტემის სრულად აღდგენას დიდი დრო დასჭირდება.

ლეღვნის წყალსადენი 7 ივნისს საღამოს მოსული უხვი ნალექის შედეგად დაზიანდა.

ნინო კაპანაძე