ხარაგაულის საპატიო მოქალაქეს, კინორეჟისორ გივი ვეფხვაძეს დღეს, 19 თებერვალს, 81 წელი შეუსრულდა.

გივი ვეფხვაძემ დიდი წვლილი შეიტანა ქართული კინომატოგრაფიის განვითარებაში. მან, როგორც 1956 წლის მარტის მოვლენების მონაწილემ, გადაიღო ფილმი „9 მარტი კადრში და კადრს მიღმა.“

გივი ვეფხვაძე რამდენიმე ათეული ფილმისა და წიგნის ავტორია. ფილმის „ხსოვნა“ უმეტესი ნაწილი მან ხარაგაულში გადაიღო.

გივი ვეფხვაძემ უკვდავყო ხარაგაულელი ახმედ გოგოლაძის შემოქმედება და მისი ლექსები წიგნად გამოსცა. 1999 წელს გადაიღო დოკუმენტური ფილმი „მახსოვს ხარაგაული,“ სადაც აღწერა ხარაგაულის ყველა ღირსშესანიშნავი ადგილი, მოვლენა, გამორჩეული ხარაგაულელების ცხოვრება.

„ასაკის მატებასთან ერთად ადამიანი ზოგიერთ რამეს სულ სხვა თვალით ხედავ და აფასებ,“ – გვითხრა ბატონმა გივიმ, როცა გასულ წელს 80 წლის იუბილესთან დაკავშირებით მასთან ინტერვიუ ჩავწერეთ.

ჯანმრთელობას და დიდხანს სიცოცხლეს ვუსურვებთ ჩვენს თანამემამულეს.

ფოტოზე: გივი ვეფხვაძე ხარაგაულის სახალხო თეატრის მსახიობ დავით ჭყოიძესთან ერთად, 2014 წ.