პირველკლასელთა რეგისტრაციის მეხუთე ეტაპი დღეს, 31 ივლისს, დასრულდება.

ამ ეტაპზე, სკოლის ბაზებში, გამოთავისუფლებულ ვაკანტურ ადგილზე ან დარჩენილ თავისუფალ ადგილებზე იმ მოსწავლეების რეგისტრაცია ხორციელდება, რომლებიც ამ დრომდე ვერ დარეგისტრირდნენ, ან სურთ რეგისტრაციის შეცვლა.

ხარაგაულის საგანმანათლებლო რესურსცენტრის უფროსის, მარინე ვეფხვაძისგან მოპოვებული ინფორმაციით, რეგისტრაციის მეხუთე ეტაპზე, ხარაგაულში მოქმედ სკოლებში, ფაქტობრივად, პირველკლასელთა რაოდენობა აღარ იცვლება.

ხარაგაულის მუნიციპალიტეტში მოქმედ 26 სკოლაში 2026-2027 სასწავლო წლისთვის 130 პირველკლასელია დარეგისტრირებული.

  • ყველაზე მეტი – 15-15 პირველკლასელი დარეგისტრირდა ხარაგაულის სკოლა-გიმნაზიასა და კიცხის საჯარო სკოლაში;
  • ხარაგაულის #2 და ვერტყვიჭალის საჯარო სკოლებში – 8-8;
  • ხარაგაულის #3, ვარძიისა და ზვარეს საჯარო სკოლებში – 7-7;
  • ბორითის საჯარო სკოლაში – 6;
  • ხევის, უბისას, ბორისა და მარელისის საჯარო სკოლებში – 5-5;
  • ღორეშის, ვაშლევის, ლეღვნისა და ხუნევის საჯარო სკოლებში – 4-4;
  • საღანძილის, ნადაბურის, ვახანის, წყალაფორეთისა და ხიდრის საჯარო სკოლებში – 3-3;
  • ბაზალეთისა და ლაშის საჯარო სკოლებში – 2-2;
  • მოლითისა და სარგვეშის საჯარო სკოლებში – თითო-თითო პირველკლასელი;
  • წიფის საჯარო სკოლაში არც ერთი პირველკლასელი არ დარეგისტრირებულა.

გასულ, 2025-2026 სასწავლო წელს პირველ კლასში სწავლა ხარაგაულის მუნიციპალიტეტში მოქმედ 26 სკოლაში 134-მა პირველკლასელმა დაიწყო, 2024-2025 სასწავლო წელს – 155-მა პირველკლასელმა, 2023-2024 სასწავლო წელს კი სწავლას 157 პირველკლასელი შეუდგა.