ხარაგაულის თვითმმართველობისგან ნადაბური-ხევი-უბისა-ღორეშა-სარგვეში-ბაზალეთი-ხარაგაულის მიმართულებით მოსახლეობის ტრანსპორტით მომსახურებისთვის გამოცხადებულ ტენდერში გამარჯვებული გამოვლინდა.

ძირულას ხეობის მოსახლეობა მუნიციპალური ტრანსპორტის დანიშვნას, წლებია, ითხოვს და ამ საკითხს „ჩემი ხარაგაულის“ რედაქცია პერმანენტულად აშუქებდა.

ტენდერში გამარჯვებული მოსახლეობის ტრანსპორტით მომსახურებას 6 732 ლარად გეგმავს. ტენდერი 7 200 ლარზე იყო გამოცხადებული.

სატენდერო დოკუმენტაციის მიხედვით, საზოგადოებრივმა ტრანსპორტმა მგზავრები ხევიდან ხარაგაულის მიმართულებით კვირაში ორჯერ უნდა გადაიყვანოს.

ორშაბათსა და ოთხშაბათს ტრანსპორტი ნადაბურიდან 07:30 საათზე უნდა გამოვიდეს, ხარაგაულიდან ხევის მიმართულებით 13:00 საათზე დაბრუნდეს.

მგზავრობის ღირებულება, 4 ლარის ნაცვლად, 1 ლარი იქნება, ხოლო შიდა გადაადგილება 0.50 თეთრი ეღირება.

ტენდერში გამარჯვებული ვალდებული იქნება მოსახლეობას ტრანსპორტით 2022 წლის 31 იანვრის ჩათვლით მოემსახუროს.