დღეს, 2 აპრილს, ხარაგაულის მუნიციალიტეტის საკრებულოს მორიგი სხდომა გაიმართა.

დეპუტატებმა საკრებულოს სხდომაზე დადებითად შეაფასეს 2017 წლის ბიუჯეტის შესრულების ანგარიში, მხარი დაუჭირეს საპრივატიზებო ობიექტთა ნუსხაში ხარაგაულის საფოსტო განყოფილების შენობის უკან მდებარე არასასოფლო-სამეურნეო დანიშნულების მიწის ნაკვეთის შეტანას და ხარაგაულის საოლქო საარჩევნო კომისიისთვის დამატებითი ფართის გადაცემას.

საკრებულოს წევრებმა ცნობად მიიღეს ხარაგაულის საკრებულოში ორი ახალი ფრაქციის – „თვითმმართველობა ხალხისათვის“ და „ქართული ოცნება-მწვანეების“ შექმნა.

ფრაქცია „ქართული ოცნება-მწვანეები“ შექმნეს დეპუტატებმა აკაკი ლურსმანაშვილმა, იულონ კოპაძემ და მარინე ხვედელიძემ. ამ ფრაქციას აკაკი ლურსმანაშვილი უხელმძღვანელებს, მოადგილე იულონ კოპაძე იქნება.

ფრაქციის „თვითმმართველობა ხალხისათვის“ თავმჯდომარეა დეპუტატი „შენების მოძრაობიდან“ ინგა მაღრაძე, მისი მოადგილე – დეპუტატი „ევროპული საქართველოდან“ აკაკი მაჭავარიანი.

ხარაგაულის მუნიციპალიტეტის საკრებულოში, ახალშექმნილი ფრაქციების ჩათვლით, ხუთი ფრაქციაა.

ფრაქციის თავმჯდომარის ყოველთვიური ანაზღაურება 1 650 ლარია, მოადგილის – 1 100 ლარი.