უკვე 28 წელი გავიდა 9 აპრილის სისხლიანი ტრაგედიის დღიდან, როდესაც თავისუფლებისა და დამოუკიდებლობისათვის ბრძოლაში საქართველომ 21 საუკეთესო შვილი დაკარგა.

9 აპრილს თბილისში, რუსთაველის გამზირზე გმირულად დაღუპულთა შორის ხარაგაულის რაიონის მკვიდრი ელისო ჭიპაშვილი გახლდათ.

„ორმაგი ემოციათა დატვირთული ეს დღე, – მიმართა დღეს 9 აპრილის სკვერში შეკრებილთ ხარაგაულის გამგეობის კულტურის სამსახურის უფროსმა ირინე ჩხეიძემ, – 9 აპრილი არის ტკივილისა და სიხარულის დღე. ტკივილისა, რადგან საქართველომ ამ დღეს თავისი საუკეთესო შვილები დაკარგა; სიხარულისა იმის გამო, რომ ორი წლის შემდეგ, 1991 წლის 9 აპრილს, რეფერენდუმის საფუძველზე საქართველოს დამოუკიდებლობა აღდგა.

 

1989 წლის 9 აპრილს დემონსტრანტთა უმთავრესი მოთხოვნა საქართველოს დამოუკიდებლობის აღდგენა და საბოთა კავშირის შემადგენლობიდან გამოსვლა იყო. ჩვენი ვალია, არასოდეს დავივიწყოთ მათი სახელები, ვინც ქვეყნის უკეთეს მომავალს თავი შეწირა.

შეკრებილთ მიესალმნენ 9 აპრილის დემონსტრაციის მონაწილეები – პარლამენტარი კობა ლურსმანაშვილი და ხარაგაულის საკრებულოს წევრი ვარლამ თავზარაშვილი; ხარაგაულის #2 საჯარო სკოლის მოსწავლე გიგა ხიჯაკაძე.

კობა ლურსმანაშვილმა აღნიშნა, რომ 9 აპრილს დაღუპული გმირების თავდადებას უკვალოდ არ ჩაუვლია. ჩვენი ქვეყანა ევროპულმა ოჯახმა მიიღო; დღეს საქართველო ევროკავშირის წინ, კარის შეღების მომენტში, დგას. ამას საფუძველი დამოუკიდებლობისათვის ბრძოლას შეწირული გმირების თავდადებამ შეუქმნა.“

9 აპრილს დაღუპულთა მოსახსენიებელი პარაკლისი ხარაგაულის წმიდა ანდრია პირველწოდებულის სახელობის ეკლესიის მოძღვარმა მამა ანტონმა (სულხანიშვილი) აღავლინა.