ამის შესახებ პარლამენტში შესულია კანონპროექტი, რომელიც დაჩქარებული წესით განიხილება.

პირებს, რომლებიც ცხოვრობენ 2016 წლის პირველ იანვრამდე მოქმედი „მაღალმთიანი რეგიონების სოციალურ-ეკონომიკური და კულტურული განვითარების შესახებ“ საქართველოს კანონის მე-6 მუხლით განსაზღვრულ ჩამონათვალ სოფლებში, თემებსა და დაბებში, შეუნარჩუნდებათ 2016 წლის 1 იანვრამდე მოქმედი საგადასახადო შეღავათი საშემოსავლო გადასახადში.

ხარაგაულის შემთხვევაში ეს შეეხებათ ზვარეში, წიფაში, ჩრდილსა და ნადაბურში მცხოვრებთ. ჭიათურის მუნიციპალიტეტის 40-მდე სოფელი იყო ამოვარდნილი. ეს შეეხება ტყიბულის სოფლებსაც და ა.შ.

ეს ინფორმაცია პარლამენტარ ნოდარ ებანოიძისგან მივიღეთ.

„დღეს საფინანსო-საბიუჯეტო კომიტეტში ვიხილავთ ამ კანონპროექტს. ამ კვირის განმავლობაში, მაღალი ალბათობით, მივიღებთ ამ კანონს, რომელიც 2016 წლის პირველი იანვრიდან ამოქმედდება,“ – ამბობს საფინანსო-საბიუჯეტო კომიტეტის თავმჯდომარის პირველი მოადგილე ნოდარ ებანოიძე.

მისივე თქმით, პარალელურად, გაგრძელდება მუშაობა იმისათვის, რომ ხარაგაულის მუნიციპალიტეტის მაღალმთიანის სტატუსდაკარგულ სოფლებს კვლავ მიენიჭოს მაღალმთიანი დასახლებების სტატუსი.