ხარაგაულის მუნიციპალიტეტის მერიის ადმინისტრაციული სამსახურის უფროსმა კახა გოლუბიანმა მერიაში მიმდინარე რეორგანიზაციის შესახებ ინფორმაცია ხარაგაულის საკრებულოს ბიუროს დღეს, 15 ივნისს, წარუდგინა.

კახა გოლუბიანის ინფორმაციით, მერიაში 78 შტატიდან 66 შტატი დარჩება. ეს გაუქმებული 12 შტატი მერიაში ვაკანტური იყო და ამ პოზიციებზე არავინ მუშაობდა.

გაერთიანდება მერიის ადმინისტრაციული სამსახურის კანცელარიისა და იურიდიული განყოფილებები. მერიის კეთილმოწყობისა და ინფრასტრუქტურის სამსახურში დაემატება კეთილმოწყობის განყოფილება.

ადმინისტრაციულ ერთეულებში მერის წარმომადგენლების ასისტენტებად შრომითი ხელშეკრულებით 12 პირი იყო დასაქმებული. 12-ვე მათგანთან, რეორგანიზაციის შემდეგ, ადმინისტრაციული ხელშეკრულები გაფორმდება. ამ დრომდე ადმინისტრაციული ხელშეკრულებით 48 პირი იყო დასაქმებული.

შტატები უცვლელად დარჩება:

  • სახელმწიფო შესყიდვებისა და მატერიალურ-ტექნიკური უზრუნველყოფის სამსახურში;
  • საფინანსო-საბიუჯეტო სამსახურში;
  • შიდა აუდიტისა და მონიტორინგის სამსახურში.

რეორგანიზაციის გამო ცვლილებები შევა მერიისა და მერიის სამსახურების დებულებებში.

კახა გოლუბიანის ინფორმაციით, რეორგანიზაციის შემდეგ არაფერი შეიცვლება თანამდებობრივ სარგოებში.

  • მუნიციპალიტეტის მერის ხელფასი 7 360 ლარია;
  • მუნიციპალიტეტის მერის პირველი მოადგილის – 5 600 ლარი;
  • მუნიციპალიტეტის მერის მოადგილის – 5 120 ლარი;
  • მერიის სამსახურის უფროსის – 3 680 ლარი;
  • განყოფილების უფროსის – 2 880 ლარი;
  • პირველი კატეგორიის უფროსი სპეციალისტის – 2 080 ლარი;
  • II კატეგორიის უფროსი სპეციალისტის – 1 920 ლარი;
  • III კატეგორიის უფროსი სპეციალისტის – 1 440 ლარი;
  • I კატეგორიის უმცროსი სპეციალისტის – 1 280 ლარი;
  • II კატეგორიის უმცროსი სპეციალისტის – 1 200 ლარი;
  • III კატეგორიის უმცროსი სპეციალისტის – 1 200 ლარი.
  • ადმინისტრაციულ ერთეულებში მერის წარმომადგენლის – 2 196 ლარი;
  • მერის წარმომადგენლის ასისტენტის – 1 170 ლარი.

რეორგანიზაციასთან დაკავშირებული საკითხები ხარაგაულის მუნიციპალიტეტის საკრებულომ 17 ივნისის რიგგარეშე სხდომაზე უნდა განიხილოს, დასამტკიცებლად.