ერთი წელია, რაც ხარაგაულის სკოლა-გიმნაზიის VI კლასის მოსწავლე, ხარაგაულის „ჩხერიმელას“ გუნდის კაპიტანი ანდრია კვინიკაძე თბილისის „დინამოს“ რეგიონული ნაკრების წევრია.

გასულ კვირაში ამ გუნდმა ლიეტუვის დედაქალაქ ვილნიუსში ატეიტის თასზე იასპარეზა. გუნდმა ოთხი თამაშიდან სამი მოიგო.

როგორ დაინტერესდა ფეხბურთით და რა გეგმები აქვს სამომავლოდ, ამის შესახებ თავად ანდრიას ვესაუბრეთ.

ანდრია კვინიკაძეს თბილისის 14 წლამდე ასაკის „დინამოს“ რეგიონულ ნაკრებში თამაშის შესაძლებლობა ხარაგაულის მუნიციპალიტეტსა და „დინამოს“ აკადემიას შორის გაფორმებული მემორანდუმის ფარგლებში მიეცა. „დინამოს“ მწვრთნელები საქართველოს სხვადასხვა რეგიონებში ნორჩ ფეხბურთელებს აკვირდებიან. ანდრიას მონაცემები მწვრთნელ პაატა მეტრეველს ძალიან მოეწონა.

„ფეხბურთით 9 წლის ასაკში დავინტერესდი,- ამბობს ანდრია, – ჩემი პირველი მწვრთნელი ავთო ლომსაძე იყო. შემდეგ ხარაგაულში 2013-2014 წლებში დაბადებული ვაჟების გუნდი ჩამოყალიბდა და იქ გადავედი. ახლა ჩემი მწვრთნელი გოჩა გელაშვილია.

გოჩა მასწავლებელი ჩემი დიდი მხარდამჭერია. ფეხბურთის წრეში ვარჯიში თავად გადავწყვიტე. ფეხბურთზე ხშირად მესაუბრება ბიძაჩემი თაზო ჯანიაშვილი, რომელიც „ჩხერიმელაში“ თამაშობდა.

თავიდან ლიონელ მესის გულშემატკივარი ვიყავი. თუმცა, შემდეგ, როცა ევროპის ჩემპიონატზე საფრანგეთის თამაშს ვუყურე, კილიან მბაპეს თამაში ძალიან მომეწონა. მას შემდეგ სულ კილიან მბაპეს წარწერიანი მაისურით დავდივარ.

ვილნიუსში გაფრენამდე თბილისში ხუთი დღე გვქონდა წვრთნები. ორი თამაში თბილისში ჩავატარეთ. ჩვენზე უფროსი ასაკის ფეხბურთელებით დაკომპლექტებულ გუნდებს მოვუგეთ.

ვილნიუსში თამაშები ჩემთვის ძალიან დიდი გამოცდილება იყო. ამ გუნდში საყრდენი ნახევარმცველის პოზიციაზე ვარ. შემდგომი წვრთნებისა და თამაშების შესახებ მწვრთნელი დაგვიკავშირდება.

მადლობა მინდა ვუთხრა ყველას, ვისაც ჩემი წარმატება უხარია. მიზნის მისაღწევად ბევრი შრომა

„ანდრიას ყველა თამაშს ვესწრები როგორც ხარაგაულში, ისე ხარაგაულს გარეთ, – ამბობს ანდრია კვინიკაძის დედა ია ჯანიაშვილი, – სექტემბრიდან საცხოვრებლად თბილისში გადავდივართ. ეს ანდრიას კარიერისთვის აუცილებელია.

ხარაგაულიდან თბილისში საწვრთნელ ბაზაზე სიარული გაგვიჭირდება. მწვრთნელმა გოჩა გელაშვილმა გვითხრა, რომ ანდრია აუცილებლად დიდ ასპარეზზე უნდა გავიდეს. გოჩა მასწავლებელი საუკეთესო მრჩეველია. მას დიდი წვლილი მიუძღვის ანდრიას წარმატებაში.

ხარაგაულის თვითმმართველობასა და „დინამოს“ აკადემიას შორის თანამშრომლობითი მემორანდუმი არის საუკეთესო შესაძლებლობა, რომ რეგიონებში ნიჭიერი ფეხბურთელები აღმოაჩინონ და მათ განვითარებაზე იზრუნონ. ანდრიამ მაგალითი მისცა თავის თანაგუნდელებს, რომ თუ მოინდომებენ, მიზანს აუცილებლად მიაღწევენ.

„ჩემმა ხარაგაულმა“ სოციალურ ქსელში ანდრიას შესახებ ინფორმაცია რომ გაავრცელეთ, ბევრმა ადამიანმა ძალიან გულწრფელად მოგვილოცა. ამიტომ მინდა ყველას დიდი მადლობა ვუთხრა. ჩემს ცხოვრებაში რთული პერიოდები იყო, ანდრიას წარმატებამ ყველაფერი ბედნიერებით შეცვალა“. წარმატებებს ვუსურვებთ ანდრია კვინიკაძეს.

ფოტოზე: ცენტრში ანდრია კვინიკაძე თანაგუნდელებთან ერთად